Waqt udjenza li kellu l-Ministru għall-Affarijiet Barranin u Ewropej, Ian Borg, il-Papa Franġisku qallu ż-żjara tiegħu f’Malta tfakkru fil-qalb tajba li għandhom il-Maltin.
Hawnhekk mal-Papa Franġisku, il-Ministru Ian Borg sostna li Malta hija dejjem onorata biż-żjara tal-Qdusija Tiegħu f’pajjiżna.
Tkellmu wkoll dwar il-ħidma li għaddejja b’mod bilaterali bejn iż-żewġ stati, kif ukoll dwar ix-xogħol li għaddej minn pajjiżna bi preparazzjoni għall-Kunsill tas-Sigurtà għan-Nazzjonijiet Magħquda bil-għan li pajjiżna jibqa’ jkun aġent tal-paċi u l-istabbiltà madwar id-dinja.
Matul din iż-żjara fl-istat tal-Vatikan, il-Ministru Borg kellu ltaqa’ wkoll mas-Segretarju tal-Istat tal-Vatikan, il-Kardinal Pietro Parolin u l-Arċisqof Paul Richard Gallagher.
Kompliet tiġi diskussa r-relazzjoni twila bejn iż-żewġ stati u l-importanza li għad għandu l-kattoliċiżmu f’pajjiżna. Ġiet diskussa wkoll il-ħidma li hemm bżonn issir bejn l-uffiċji tal-Affarijiet Barranin taż-żewġ stati sabiex tiġi mwaqqfa Kummissjoni Konġunta biex tiddiskuti l-immaniġġjar tal-artijiet tas-sede qaddisa f’Malta.
L-immigrazzjoni fil-Mediterran, is-sitwazzjoni fil-Libja u l-kunflitt bejn l-Ukrajna u r-Russja kienu wkoll fuq l-aġenda.
