Il-musical popolari ‘Dear Evan Hansen’ se jittella’ fi Frar fuq il-palk tat-Teatru Manoel, fi produzzjoni bejn l-istess teatru u FM Theatre Productions.
Il-musical, miktub minn Steven Levenson, bil-mużika ta’ Benj Pasek u Justin Paul, jirrakkonta l-istorja ta’ Evan Hansen, ġuvni li jbati minn ansjetà soċjali u li, wara l-mewt ta’ sieħbu Connor, isib ruħu involut f’konfużjoni li tinfirex permezz tal-mezzi soċjali.
Il-kast f’pajjiżna se jinkludi lil Kyle Mangani u Luigi Buhagiar bħala Evan Hansen, u Kristen Abela u Charlotte Formosa, bħala Zoe Murphy. Magħhom jingħaqad ukoll it-talent ta’ Dorothy Bezzina, Nadine Farrugia u Raphael Pace.
Il-produzzjoni se tkun f’idejn Denise Mulholland, bi Kris Spiteri bħala d-direttur mużikali u Matthew Cassar responsabbli mid-disinn tas-sett.
Ir-rappreżentazzjonijiet se jsiru bejn is-7 u d-9 ta’ Frar u mit-13 sas-16 ta’ Frar fis-7:30 p.m., u matinée fis-16 ta’ Frar fit-3:00 p.m.
Biljetti jistgħu jinxtraw minn fuq is-sit teatrumanoel.mt jew mill-box office tat-Teatru Manoel li jista’ jiġi kkuntattjat fuq in-numru tat-telefown 21246389.
