“Peress li hija gżira żgħira, Malta għandha ħafna x’toffri fil-qasam tal-iżvilupp sostenibbli, fid-dawl tad-daqs żgħir tagħha u l-pressjonijiet varji tal-iżvilupp. Żewġ oqsma li jispikkaw huma l-ġestjoni tal-iskart solidu u l-ġestjoni tar-riżorsi tal-ilm “, qal il-Ministru tal-Finanzi Edward Scicluna fil-Konferenza ta’ Livell Għoli dwar il-Finanzjament għall-Iżvilupp u l-Aġenda 2030 għall-Iżvilupp Sostenibbli f’Doha, Qatar fit-18 u d-19 ta’ Novembru 2017.
Il-Ministru Scicluna ndirizza d-diskussjonijiet ministerjali dwar l-isforzi u l-innovazzjonijiet tal-politika mmirati lejn l-implimentazzjoni tal-Aġenda ta’ Azzjoni ta’ Addis Ababa u l-miri ta’ Żvilupp Sostenibbli. Il-Ministru Scicluna qal li t-tkabbir ekonomiku bla preċedent ta’ Malta, li nkiseb parzjalment permezz ta’ riformi strutturali, irnexxielu jżid il-parteċipazzjoni tal-ħaddiema nisa f’konformità mal-Objettiv5 tal-Iżvilupp Sostenibbli.
Il-Ministru Scicluna tkellem dwar il-parteċipazzjoni ta’ Malta fi sforzi internazzjonali permezz tal-politika ta’ Assistenza Uffiċjali għall-Iżvilupp, prinċipalment il-kofinanzjament ta ’12-il proġett f’Afrika, Asja u Amerika t’Isfel fl-oqsma tas-saħħa, edukazzjoni, ilma u ugwaljanza bejn is-sessi.
Fuq il-marġini tal-konferenza, il-Ministru Scicluna iltaqa’ mal-Ministru tal-Finanzi tal-Qatar Ali Shareef Al Emadi u ddiskutew kwistjonijiet t’ interess reċiproku għaż-żewġ pajjiżi. Huwa kellu wkoll laqgħa bilaterali mas-Sotto-Segretarju Ġenerali tal-Affarijiet Ekonomiċi u Soċjali tan-Nazzjonijiet Uniti Liu Zhenmin. Il-Ministru aġġorna lis-Sotto-Segretarju Ġenerali dwar l-impenji ta’ Malta fl-implimentazzjoni tal-Għanijiet ta’ Żvilupp Sostenibbli li jinsabu fl-Aġenda 2030 u l-finanzjament tagħhom. Fid-diskussjonijiet, saret referenza speċjali għall-investiment tal-UE fir-reġjun MENA u l-inizjattiva tal-Patt tal-G20 mal-Afrika, li t-tnejn jistgħu jkollhom impatt pożittiv kemm fuq l-iżvilupp kif ukoll fuq il-migrazzjoni.
