Il-Ministru għall-Edukazzjoni u x-Xogħol Owen Bonnici ġie ppreżentat bil-ktieb ‘L-Elf Mistoqsijia ta’ Dino Ricciolino Dwar il-Virus Corona’. Din il-pubblikazzjoni saret bil-kollaborazzjoni tal-Aġenzija Nazzjonali tal-Litteriżmu u huwa mmirat għal tfal li għandhom bejn it-3 snin u l-10 snin.
L-għan ewlieni ta’ dan il-ktejjeb hu li jispjega b’mod ċar u ħafif, imma xjentifikament korrett, bosta domandi li jkollhom it-tfal. Dan wara li l-imxija tal-Covid-19 bosta persuni, speċjalment it-tfal raw bidla drastika fid-dinja ta’ madwarhom.
Il-Ministru Bonnici stqarr li, “l-għarfien huwa l-ewwel pass biex wieħed jifhem l-affarijiet li jkunu qed jiġru” u għalhekk permezz ta’ dan il-ktejjeb it-tfal qed jingħataw għodda bżonjuża biex tgħinhomjaffaċċjaw ir-realtà imma fl-istess ħin iżidu s-sens ta’ responsabbiltà biex jipproteġu lilhom infushom u lill-qrabathom. Huwa sostna li din il-pubblikazzjoni hija wkoll ta’ għajnuna lill-familji biex iwieġbu d-domandi b’mod ċar.
Il-Ministru Bonnici esprima s-sodisfazzjon tiegħu għall-fatt li l-ktejjeb huwa bilingwi, jiġifieri huwa ppubblikat bil-Malti u bl-Ingliż. Dan bil-għan li jkun jista’ jinqara mit-tfal kollha tal-gżejjer Maltin. Il-Ministru Bonnici ħabbar li dan il-ktejjeb se jingħata lill-istudenti Maltin u Għawdxin f’format ta’ ta’ e-Book, mingħajr ħlas.
Il-pubblikatriċi stqarret li meta rċiviet il-manuiskritt ta’ dan il-ktieb mill-awtriċi Chiara Battistelli mal-ewwel indunat li huwa biċċa xogħol tajba u edukattiva, għalhekk aċċettatu.Spjegat ukoll li permezz tat-traduzzjoni tiedu joħorġu s-sabiħ tal-ilsien Malti, kif ukoll il-potenzjal tiegħu meta jiffaċċja l-isfidi sabiex tinstab terminoloġija adegwata li tista’ tintuża fil-ħajja ta’ kuljum.
Huma rringrazzjaw lil kull min ta s-sehem fil-produzzjoni ta’ din il-pubblikazzjoni b’mod speċjali lis-Sur David Muscat mill-Aġenzija Nazzjonali tal-Litteriżmu li wera appoġġ mill-bidu nett. It-traduzzjoni għall-Malti saret minn Joanne Micallef, waqt li Toni Aquilina kien l-editur. Il-qari tal-provi sar mill-Agenzija stess waqt li l-editjar tal-verżjoni bl-Ingliż sar minn Proofreading Malta. Id-disinn tal-ktieb sar minn Naomi Gatt.
