Il-Ministru għall-Affarijiet Barranin u Ewropej u l-Kummerċ, Ian Borg, kellu l-pjaċir jilqa’ lill-Ministru għall-Affarijiet Barranin taċ-Ċina, Wang Yi, fl-ajruport mal-inżul tiegħu għal diskussjonijiet diplomatiċi mal-Konsulent tas-Sigurtà Nazzjonali tal-Istati Uniti tal-President, Joe Biden.
Il-laqgħa kienet segwita minn diskussjoni qasira iżda estensiva dwar ir-relazzjonijiet diplomatiċi bejn Malta u ċ-Ċina kif ukoll bejn l-Unjoni Ewropea u ċ-Ċina.
Iż-żewġ ministri tal-affarijiet barranin qablu li l-unika triq ’il quddiem hija li jkomplu jippromwovu relazzjoni kostruttiva fil-livelli kollha.
Il-Ministru Ian Borg kellu wkoll l-opportunità li jakkumpanja lill-Prim Ministru Robert Abela waqt il-laqgħa tiegħu ma’ Jake Sullivan, il-Konsulent tas-Sigurtà Nazzjonali tal-Istati Uniti tal-President Joe Biden.
Waqt din il-laqgħa, il-Ministru Borg kellu l-opportunità li jkollu diskussjoni qasira mal-konsulent tas-sigurtà nazzjonali tal-Istati Uniti dwar ir-rwol attwali ta’ Malta bħala membru mhux permanenti tal-Kunsill tas-Sigurtà tan-Nazzjonijiet Magħquda u dwar l-impenji tiegħu għall-ġimgħa d-dieħla waqt il-ġimgħa ddedikata għal-laqgħat ta’ livell għoli tan-Nazzjonijiet Magħquda.
Wara dawn il-laqgħat, il-Ministru Ian Borg ikkummenta li l-Ministeru għall-Affarijiet Barranin u Ewropej u l-Kummerċ se jkompli jagħmel il-parti tiegħu sabiex jiffaċilita opportunitajiet miftuħa ta’ komunikazzjoni f’konformità mal-politika li jkollna futur aktar ġust, paċifiku u prosper.
