Il-Ministru għall-Ġustizzja Jonathan Attard ippreżenta l-warranta lil sbatax-il Avukat u Prokuratur Legali ġodda, wara li dawn urew il-kompetenza tagħhom li jeżerċitaw il-professjoni legali.
Waqt li inawgura lil dawn il-professjonisti legali ġodda, il-Ministru saħaq li kif jixraq il-proċess li jwassal għal għoti tal-Warrants huwa wieħed distint mill-Ministeru, imma l-Ministeru joffri kull assistenza meħtieġa lill-Kumitat tal-Avukati u Prokuraturi Legali biex iwettqu l-funzjoni tagħhom u l-proċess ma jdumx aktar milli meħtieġ.
Il-Ministru Attard semma l-livell ta’ investiment bla preċident fir-riżorsi umani li qed isir fl-istituzzjonijiet kollha tal-ġustizzja f’pajjiżna.
“Dan huwa żmien importanti u interessanti fis-settur tal-ġustizzja, hekk kif għaddejjin minn proċessi ta’ riformi f’diversi oqsma, mhux wisq fil-kamp kriminali, imma wkoll dak ċivili u tajt redikont lil dawn issa professjonisti l-ġodda ta l-ammont ta’ tibdiliet li qed isiru u li għandhom iwasslu jew għandhom l-intenzjoni għal ġustizzja aktar effettiva u effiċjenti għaċ-ċittadini tagħna.”
Il-Ministru Jonathan Attard,
Fost dawn ir-riformi, il-Ministru Attard semma lil fil-Parlament se jitressqu emendi b’rabta mal-proċess tal-kumpilazzjonijiet u abbozz ta’ liġi ieħor li jistabbilixxi l-ħolqien ta’ Qorti Kummerċjali Speċjalizzata.
Iċ-ċerimonja kienet indirizzata wkoll mill-Prim Imħallef Mark Chetcuti, l-Avukat Cedrick Mifsud mill-Kamra tal-Avukati u l-President tal-Kamra tal-Prokuraturi Legali Gerald Bonello.
