Il-Deputat Prim Ministru u Ministru għall-Affarijiet Barranin u t-Turiżmu Ian Borg ħabbar li l-Gvern se jkompli jżid il-boroż ta’ studju għal studenti minn pajjiżi li qed jiżviluppaw u minn reġjuni milquta mill-gwerer, hekk kif Malta ttenni l-impenn tagħha lejn l-edukazzjoni bħala ċ-ċavetta għall-iżvilupp sostenibbli u l-paċi.
Din il-ġimgħa, id-Deputat Prim Ministru Borg żar l-Università ta’ Malta u l-Akkademja Mediterranja għall-Istudji Diplomatiċi (MEDAC) ġewwa l-Imsida, sabiex jiltaqa’ mal-istudenti internazzjonali li bħalissa qed jibbenefikaw minn boroż ta’ studju li l-Ministeru qed jiffinanzja għas-sena akkademika 2024/25. L-investiment ta’ €265,000 f’dawn is-16-il borża ta’ studju għall-istudji postuniversitarji jagħmel parti mill-Għajnuna Uffiċjali għall-Iżvilupp ta’ Malta (ODA), l-impenn tal-pajjiż li jipprovdi għajnuna umanitarja u għall-iżvilupp lill-komunitajiet f’pajjiżi li qed jiżviluppaw u f’reġjuni milquta minn gwerer u diżastri naturali.
Ir-Rettur tal-Università ta’ Malta, il-Professur Alfred J. Vella, il-Pro-Rettur, il-Professur Frank Bezzina, il-President Emeritu u Chairperson tal-MEDAC Dr George Vella, kif ukoll id-Direttur tal-MEDAC il-Professur Stephen Calleya laqgħu lil Dr Borg fl-Università ta’ Malta, għal laqgħat ma’ studenti mill-Ghana, l-Etjopja, il-Libja, il-Palestina, ir-Rwanda, l-Eġittu, id-Djibuti u t-Tuneżija. Il-korsijiet li qed isegwu jinkludu d-Diplomazija, l-Azzjoni Umanitarja, l-Iżvilupp Sostenibbli, l-Enerġija Sostenibbli, ir-Riżoluzzjoni tal-Kunflitti u suġġetti oħra fl-Università ta’ Malta.
L-istudenti tkellmu dwar l-esperjenzi akkademiċi u l-aspirazzjonijiet tagħhom f’laqgħat ta’ djalogu miftuħ. Huma enfasizzaw l-impatt pożittiv li qed jagħmel il-programm ta’ boroż ta’ studju fuq it-tkabbir personali u professjonali tagħhom. Fil-MEDAC, l-istudenti ddiskutew ma’ Dr Borg suġġetti bħar-relazzjonijiet bejn l-UE u l-Afrika, l-investiment ekoloġiku, u d-diplomazija multilaterali.
Il-Deputat Prim Ministru nnota li din is-sena akkademika rat l-ogħla ammont ta’ boroż ta’ studju li qatt ġew offruti mill-Ministeru għall-Affarijiet Barranin u t-Turiżmu bħala parti mill-ODA ta’ Malta. Dan l-impenn se jkompli jiżdied fis-snin li ġejjin, hekk kif numru akbar ta’ boroż ta’ studju għas-sena akkademika 2025/26 diġà ġie approvat. Il-Ministeru qed jiffinanzja wkoll boroż ta’ studju fil-livell ta’ Dottorat u Master’s fl-Istitut tal-Gżejjer u Stati Żgħar tal-Università, għal studenti minn Stati Żgħar li Qegħdin Jiżviluppaw (SIDS), li Malta tappoġġja b’mod attiv permezz ta’ diversi inizjattivi internazzjonali.
“L-edukazzjoni hija ċ-ċavetta għall-iżvilupp sostenibbli. Permezz ta’ dawn il-boroż ta’ studju, aħna qed nagħtu kontribut pożittiv għall-iżvilupp tal-pajjiżi tagħkom, għax it-taħriġ tagħkom hawnhekk se jħalli l-frott fil-ħidma tagħkom fil-komunitajiet tagħkom, fil-futur,” qal Dr Borg lill-istudenti.
Ir-Rettur tal-Università ta’ Malta, il-Professur Alfred J. Vella qal li “l-Università ta’ Malta tesprimi l-gratitudni tagħha għall-investiment u għall-isforz kollaborattiv immirat li jkompli jsaħħaħ din l-inizjattiva ta’ boroż ta’ studju. Dan jiżgura l-kontinwità u l-possibilità ta’ opportunitajiet għal studenti minn komunitajiet u interessi differenti. Permezz ta’ din l-inizjattiva qed nappoġġjaw ukoll il-ħolqien ta’ komunità b’saħħitha ta’ gradwati tal-Università f’oqsma differenti fil-pajjiżi tagħhom.”
“Inħossuna onorati li l-Ministeru kkonferma l-impenn tiegħu li joffri appoġġ finanzjarju għas-sena akkademika li jmiss ukoll. Il-mira ewlenija se tibqa’ l-appoġġ lejn il-formazzjoni ta’ kapaċitajiet f’pajjiżi li qed jiżviluppaw u f’żoni ta’ kunflitti. Dawk li jingħataw il-boroż ta’ studju jingħaqdu ma’ komunità ta’ studenti u ħaddiema minn komunitajiet differenti, sabiex jiddiskutu u jaqsmu l-ideat u l-għarfien u ħiliet tagħhom ma’ xulxin,” żied jgħid il-Professur Vella.
Id-Direttur tal-MEDAC, il-Professur Stephen Calleya qal li ż-żjara tal-Deputat Prim Ministru fl-Akkademja kienet mument ta’ ispirazzjoni, li tat lill-istudenti l-opportunità li jitgħallmu b’mod dirett il-kumplessità tar-relazzjonijiet internazzjonali kontemporanji.
