Waqt laqgħa virtwali tal-Kunsill Ewropew, il-Prim Ministru Robert Abela tkellem fuq il-bżonn ta’ aktar koordinazzjoni u kooperazzjoni bejn l-istati membri u l-Kummissjoni Ewropea sabiex tiġi ffaċilitata l-introduzzjoni ta’ sistema diġitali għaċ-ċertifikazzjoni tat-tilqim mill-aktar fiss possibbli.
Dan hekk kif il-Ħamis filgħaxija l-mexxejja Ewropej iltaqgħu f’laqgħa virtwali tal-Kunsill Ewropew.
Il-Prim Ministru saħaq li din ser tkun għodda ferm importanti li tiffaċilita l-moviment sigur tal-persuni fit-territorju tal-Unjoni Ewropea u terġa’ tibda tagħti nifs lill-ekonomiji tal-istati membri. Huwa tkellem ukoll fuq il-bżonn ta’ ritmu aktar mgħaġġel fil-produzzjoni u t-tqassim tal-vaċċin sabiex tiżdied l-immunità u jintlaħqu l-miri ssettjati mill-Kummissjoni Ewropea.
Fi tmiem il-laqgħa, il-President tal-Kummissjoni Ewropea Ursula von der Leyen qalet li ġie propost li jkun hemm żona ħamra skura li fiha jkun hemm imniżżla dawk il-postijiet fl-Ewropa li fihom hemm firxa qawwija tal-virus tal-Covid-19.
Fuq l-aġenda għad-diskussjoni kien hemm ukoll il-ħtieġa li aktar ċittadini Ewropej jitlaqqmu kontra l-virus.
F’dan il-kuntest, Malta issa qabżet id-Danimarka u hija l-iktar pajjiż fl-Unjoni li laqqmet nies.
Il-President tal-Kunsill Ewropew Charles Michel qal li l-varjant il-ġdid flimkien ma’ żieda qawwija fin-numru ta’ infezzjonijiet, ġiegħlu lill-uffiċjali tal-Unjoni Ewropeja joħorġu b’modi ġodda biex jiddefinixxu ż-żoni l-aktar milquta.
Dan filwaqt li l-mexxejja Ewropej qalu li riedu jżommu l-fruntieri miftuħa.
Il-Prim Ministru Robert Abela ħa sehem f’dan il-Kunsill Ewropew virtwali u aktar qabel kontenut ta’ ittra li bagħat lil von der Leyen ġiet żvelata mis-sit awtorevoli Politico.
Huwa mbotta ‘l quddiem l-idea tal-passaport tal-vaċċin.
F’din l-ittra, il-Prim Ministru Malti qal li wasal iż-żmien li l-Unjoni Ewropea jkollha sistema kompjuterizzata bejn l-istati kollha li fiha jkun magħruf min huma dawk iċ-ċittadini li tlaqqmu kontra l-Covid-19.
“Li jkollok ċertifikat li ħadt il-vaċċin huwa importanti u għodda għas-saħħa pubblika ta’ kull pajjiż, speċjalment fil-moviment tan-nies bejn il-fruntieri tal-pajjiżi Ewropej”, saħaq il-Prim Ministru Dr Robert Abela.
L-idea ta’ ċertifikat li ħadt il-vaċċin ġiet diskussa fl-istess laqgħa virtwali tal-Kunsill Ewropew.
