Kien ftit wara l-ħdax u kwart tal-Ħamis filgħaxija meta l-mexxejja Ewropej fis-summit tal-Kunsill Ewropew fi Brussell qablu dwar it-tliet karigi għoljin tal-Unjoni Ewropea. Dawn huma Ursula von Leyen, Antonio Costa u Kaja Kallas.
Il-Ġermaniza Von der Leyen se terġa’ tkun il-President tal-Kummissjoni Ewropea għal ħames snin oħra, wara li diġà kienet f’dan ir-rwol fl-aħħar leġiżlatura.
Jekk Von der Leyen tkun approvata mill-Parlament Ewropew, tkun biss it-tielet President tal-Kummissjoni li se sservi għat-tieni leġiżlatura, wara Jacques Delors u Jose Manuel Barroso. B’dan ifisser li Von der Leyen se tkun l-ewwel mara li se tagħmel dan.
Von der Leyen għandha 65 sena u fil-Ġermanja serviet bħala Ministru taħt il-Gvern Federali ta’ Angela Merkel bejn l-2005 u l-2019, sakemm ġiet eletta għal dan ir-rwol fl-Unjoni Ewropea.
Fl-ewwel leġiżlatura tagħha, bħala President tal-Kummissjoni Ewropea, hi żaret pajjiżna darbtejn. F’Settembru tal-2021, Von der Leyen ġiet Malta fejn approvat il-Pjan ta’ Rkupru u Reżiljenza ta’ pajjiżna.
F’konferenza tal-aħbarijiet fil-Barrakka ta’ Fuq, flimkien mal-Prim Ministru Robert Abela, Von der Leyen fissret il-pjan ta’ Malta bħala l-aktar wieħed favur l-ambjent fost l-istati membri kollha tal-Unjoni Ewropea.
F’Settembru li għadda, il-President tal-Kummissjoni Ewropea wkoll ġiet f’pajjiżna għal-laqgħa tal-pajjiżi tan-Nofsinhar tal-Unjoni Ewropea, il-MED 9.
Fil-marġini ta’ din il-laqgħa, Von der Leyen kienet żaret l-Iskola Primarja tan-Nadur, Għawdex, fejn sar xogħol ta’ rinnovar minn fondi Ewropej. Hawnhekk f’konferenza tal-aħbarijiet, il-President tal-Kummissjoni Ewropea sejħet bħala eċċellenti l-Pjan ta’ Rkupru ta’ pajjiżna, b’70% minnu ddedikat għall-ambjent u l-qalba diġitali.
F’wieħed mid-diskorsi annwali tal-Istat tal-Unjoni, Von der Leyen innotat ir-riformi favur it-tisħiħ tas-saltna tad-dritt li għamel pajjiżna fl-aħħar snin u tenniet li Malta issa hi eżemplari f’dan ir-rigward.
Bin-nomina mill-Kunsill Ewropew issa jmiss lill-Parlament Ewropew li japprova lil Ursula von der Leyen. Jekk ma jkunx hemm qbil, il-mexxejja Ewropej iridu jinnominaw persuna oħra għal dan ir-rwol.
L-eks Prim Ministru Portugiż, Antonio Costa, se jkun qed jieħu post Charles Michel bħala President tal-Kunsill Ewropew mill-ewwel ta’ Diċembru li ġej.
Costa għandu 62 sena u kien Prim Ministru tal-Portugall bejn l-2015 sa April li għadda. Hu kien is-Segretarju Ġenerali tal-Partit Soċjalista fil-Portugall għal kważi għaxar snin u kien ukoll Sindku ta’ Lisbona.
Bħala Prim Ministru tal-Portugall hu żar pajjiżna fi Frar tal-2017, fost il-mexxejja Ewropej li attendew għas-Summit Informali tal-Kunsill Ewropew taħt il-Presidenza Maltija tal-Unjoni Ewropea bejn Jannar u Ġunju ta’ dik is-sena.
Sentejn wara, f’nofs Ġunju tal-2019, Costa reġa’ żar Malta għal-laqgħat tal-MED 7, li wkoll saru fil-Berġa ta’ Kastilja fil-Belt Valletta.
Antonio Costa kien ukoll f’Malta f’Settembru li għadda, waqt il-laqgħat tal-MED 9 f’Kastilja u fl-Imdina.
Il-Prim Ministru attwali tal-Estonja, Kaja Kallas, se tkun ir-Rappreżentant Għoli tal-Unjoni Ewropea għall-Politika ta’ Sigurtà. Hi mistennija tieħu post l-Ispanjol Josep Borrell, li kien f’dan ir-rwol fl-aħħar ħames snin.
Kallas għandha sebgħa u erbgħin sena u ilha Prim Ministru f’pajjiżha mill-2021.
Bħal fil-każ tal-President tal-Kummissjoni Ewropea, irid jittieħed vot fil-Parlament Ewropew dwar in-nomina tar-Rapprezentant Għoli tal-Unjoni.
Dawn in-nomini ma ġewx b’sorpriża, hekk kif, fl-aħħar ġimgħat, l-ismijiet tagħhom issemmew kemm-il darba u, sa din il-ġimgħa, rapporti internazzjonali qalu li kien hemm qbil rigward dawn it-tlieta li huma.
Rapporti fil-midja internazzjonali rrapportaw li l-Prim Ministru Taljana Giorgia Meloni u l-Prim Ministru Ungeriż Viktor Orban ma qablux dwar dan. Intqal li Meloni vvotat kontra Costa u Kallas, waqt li astjeniet dwar Von der Leyen. Min-naħa tiegħu, Orban ivvota kontra Von der Leyen, astjena dwar Kallas u qabel dwar Costa.
Dwar ir-rwol ta’ President tal-Parlament Ewropew, li fl-aħħar snin kien okkupat minn Roberta Metsola, il-Kunsill Ewropew ma jivvotax u min jokkupah irid jiġi elett mill-membri Parlamentari Ewropej infushom.
