Tnediet il-kampanja ‘MPs for Puttinu’, bi qbil bejn in-naħat tal-Gvern u l-Oppożizzjoni fil-Parlament.
Dan tħabbar il-Ħamis filgħodu fl-Uffiċċju tal-Ispeaker, Anġlu Farrugia, li spjega li din l-inizjattiva nobbli kienet ġiet xprunata mill-eks Deputat Robert Arrigo.
L-Ispeaker sellem il-memorja tal-ex Membru Parlamentari Arrigo u kompla billi qal li, bis-sostenn ta’ kull wieħed minna, l-għaqdiet filantropiċi jaħdmu biex jagħtu ħajja aħjar lil dawk fil-bżonn, partikolarment lil dawk l-aktar vulnerabbli.
“‘MPs for Puttinu’ se tkun attività l-ġimgħa d-dieħla fid-9 ta’ Diċembru biex, kemm jista’ jkun, intellgħu l-kontribuzzjoni finanzjarja mill-membri kollha tal-pubbliku Malti. Xi ħaġa li hija nobbli.”
Tkellimna ma’ Martina Fenech minn Puttinu Cares, li spjegat x’se tkun qed tinkludi l-attività ‘MPs for Puttinu’.
“Se jkunu għaddejjin diversi logħob – futsal, football eċċ. – fejn flimkien se jingħaqdu l-MPs hekk kif se jilagħbu kontra xulxin bil-għan li jiġbru l-flus għal Puttinu u wkoll nuru s-solidarjetà ma’ Malta -,vvjament nafu kemm diversi Maltin u Għawdxin qed jesperjenzaw it-tbatija li jsiefru barra minn xtutna. Aħna d-domanda tagħna dejjem qed tikber, allura nirrealizzaw kemm iżjed familji Maltin jaffaċċjaw id-diversi mard li hawn u l-kura barra minn xtutna. Għalhekk, dawn l-attivitajiet aħna napprezzawhom.”
Il-konferenza ġiet indirizzata wkoll mill-Whip tal-Gvern, Andy Ellul, u mill-Whip tal-Oppożizzjoni, Robert Cutajar. Huma appellaw bis-sħih biex il-poplu Malti jkompli juri l-ġenerożità tiegħu kif dejjem għamel, sabiex jgħin lil Puttinu f’din il-ħidma kontinwa, fl-interess ta’ dawk li għandhom bżonn l-għajnuna fl-aktar mumenti diffiċli għalihom.
“Kemm hu sabiħ li tara l-ogħla istituzzjoni fil-pajjiż anke tibgħat messaġġ biex forsi entitajiet oħra jagħmlu l-istess. Din hija kawża ġusta u qed nuru wkoll li fil-Parlament mhux niddibattu u nargumentaw biss imma kemm aħna, bħala Maltin, kapaċi ningħaqdu għal kawża ġusta.”
Preżenti għall-konferenza kien hemm il-membri tal-Malta Futsal Association, membri tal-Volleyball Association, kif ukoll is-Sinjura Arrigo.
