L-aħbar li l-Gvern Malti se jibda jħallas mediċina partikolari li jeħtieġu persuni bis-Cystic Fibrosis kompliet iġġib reazzjonijiet pożittivi minn bosta fosthom anke minn pajjiżi oħra.
Fuq il-programm Realtà ta’ Brian Handsford, tkellem Rich Hunter, Ingliż li għandu l-kundizzjoni tas-Cystic Fibrosis, fejn f’kollegament virtwali saħaq kemm huwa kuntent li Malta daħlet il-mediċina Trikafta fil-formularju tal-Gvern.
Hunter spjega kif minn mindu hu beda jieħdu din il-mediċina, ħajtu nbidlet totalment għax ħalliet fuqu impatt ferm pożittiv.
Qal kif, “I’m over the moon and very happy for them, as I was myself. Because it is very difficult to sit here, taken the drug and knowing what positive impacts it had on my life and knowing that there is people still suffering. For Mandy who’s lung function has decreased, these drugs are going to make her life so much better and so I’m absolutely over the moon for everyone in Malta who get the benefit of this drug.”
Fuq il-programm tkellmet ukoll Mandy Vellea, li spjegat kif dan l-iżvilupp nissel fiha u f’nies oħra bis-Cystic Fibrosis sens ta’ tama biex jgħixu ħajja aħjar.
Spjegat, “Tkun ilek sitta u għoxrin sena u tmur għand it-tabib u jgħidlek ma hemmx x’nagħmlu u filli f’daqqa waħda hemm tama li hemm x’nagħmlu. Kienet sorpriża u anke tara lin-nies ta’ madwarek kuntenti li hemm xi ħaġa li ttik ċans.”
Ftit tal-jiem ilu l-Prim Ministru Robert Abela qal li din il-mediċina tant importanti għall-persuni bil-kundizzjoni tas-Cystic Fibrosis se tkun tiswa tliet miljun ewro fis-sena jew tmintax-il elf ewro fix-xahar.
Saħaq li l-Gvern ma jistax jagħlaq għajnejh għat-tbatijiet tan-nies.
