Il-lokalità kulturali tas-sena 2022 ser tkun il-Marsa.
Dan ħabbru l-Ministru Wirt Nazzjonali, l-Arti u l-Gvern Lokali, José Herrera li spjega kif din il-lokalità kulturali tas-sena d-dieħla ser tkun mogħnija bi programm kulturali għat-12-il xahar tas-sena.
Dan ser iservi bħala għodda sabiex jinħoloq xenarju kulturali u innovattiv.
Din kienet wegħda elettorali tal-Partit Laburista u permezz ta’ din l-inizjattiva l-Gvern ser ikun qed jinvesti 200,000 ewro li issa ser jintużaw mill-Kunsill Lokali tal-Marsa.
Il-Ministru Herrera stqarr kif il-Gvern huwa kommess li jara r-riġenerazzjoni tal-Marsa kif ġara fl-ibliet tal-Kottonera fl-aħħar snin.
Spjega kif dan il-fond ser iservi għal għadd ta’ opportunitajiet għal din il-lokalità.
Huwa faħħar lill-Kunsill Lokali tal-Marsa li offrew programm attraenti li wassalhom biex il-lokalità li jirrapreżentaw tkun imsemmija l-lokalità kulturali għas-sena 2022.
“Il-Marsa b’mod partikolari għandna bżonn tirriġenera. Il-Marsa għandha storja, hija belt antika ħafna, tmur lura għal żmien il-Puniċi għal xi tliet elef sena. Pero hija Belt li hija industrijalizzata ħafna, hija Belt multi-kulturali ħafna u wasal iż-żmien allura jiena ngħid li kif kien hemm żoni oħra li l-Gvern Ċentrali investi ammont sostanzjali ta’ flus biex jirriġenera, wasal iż-żmien illi jagħmel l-istess għall-belt tal-Marsa.”
Is-Sindku tal-Marsa Josef Azzopardi stqarr kif dan it-titlu ser jgħolli l-livell tal-lokalità filwaqt li joffri opportunità sabiex il-pubbliku jkun jista’ jesperjenza l-isbuħija tal-Marsa.
Fost l-attivitajiet prinċipali fil-programm propost hemm festa kbira ta’ lwien u nar waqt serata ta’ mużika, dan filwaqt li hemm ukoll attivitajiet pjanati għal żmien il-Karnival.
Huwa spjega kif hemm ukoll numru ta’ esebizzjonijiet pjanati li fihom ser ikun espost xogħol uħud mill-iżjed artisti rinomati f’pajjiżna.
Spjega wkoll kif ser issir esebizzjoni tal-platti tal-melħ u tar-ross li s-soltu jsiru fi żmien il-Ġimgħa l-Kbira, iżda din id-darba mhux bilfors b’tema reliġjuża.
Spjega kif ser isiru wkoll inizjattivi sabiex isiru magħrufa iżjed is-siti storiċi li għandha l-Marsa.
Dan filwaqt li hemm pjanata attività kbira fuq il-baħar bi spettaklu kbir ta’ nar, dwal u kant biswit il-waterfront.
F’Diċembru imbagħad ser ikun qed isir villaġġ kbir tal-Milied b’kunċert fl-akwati tal-junction tal-Marsa.
“Nagħlqu bil-kbir ukoll għaliex fil-Marsa Junction ser nagħmlu Christmas Village pero mhux villaġġ tal-Milied kif nafu s-soltu imma ser ikun uniku u ser taraw dan l-aspett għall-ewwel darba f’Malta f’din is-sena tal-Kultura tal-Marsa.”
