F’partita ta’ ħbiberija li ntlagħbet f’Ruma, it-tim nazzjonali Taljan tan-nisa ftit tħabat biex għeleb lil dak Malti bl-iskor kbir ta’ 5-0, bil-Maltin jikkrollaw għal kollox fl-aħħar 10 minuti, fejn sofrew xejn inqas minn erba’ goals.
Ta’ nota huwa l-fatt li qabel il-partita il-viċi-president tal-MFA Dr Maria Azzopardi u s-Segretarju Ġenerali tal-istess assoċjazzjoni Dr Angelo Chetcuti ppreżentaw memento lill-captain Charlene Zammit hekk kif proprju din il-partita mmarkat il-100 waħda tagħha bil-flokk tat-tim nazzjonali Malti.
Kienu t-Taljani li ħarġu fuq l-offensiva u fir-raba’ minuta, xutt ta’ Chiara Beccari ġie salvat tajjeb minn Ebejer wara li ntefgħet minn tulha fl-art.
Huma komplew fuq l-offensiva u tliet minuti biss wara fetħu l-iskor meta wara li rċeviet minn crros ta’ Emma Severini, il-captain CRISTIANA GIRELLI kienet fil-post it-tajjeb fil-mument opportun u permezz ta’ daqqa ta’ ras preċiża mill-viċin tefgħet ġewwa.
Kulma jmur kompla d-dominju tat-Taljani u fit-32 minuta cross-shot ta’ Beccari ġie interċettat tajjeb minn Ebejer.
Il-Maltin ħolqu l-ewwel tentattiv dirett lejn il-lasti avversarji fid-49 minuta permezz ta’ Nicole Sciberras li kellha x-xutt taghħa newtralizzat mill-goalkeeper Taljana ta’ AC Milan Laura Giuliani.
L-Italja wieġbu minuta biss wara permezz ta’ Benedetta Glionna li kellha x-xutt tagħha jintemm barra.
Huma reġgħu kienu perikolużi fid-59 minuta meta freekick insidjuż ta’ Agnese Bonfantini ġie salvat b’diffikultá f’żewġ tentattivi minn Ebejer.
L-Italja komplew jassedjaw il-lasti avversarji u fil-65 minuta, il-veterana Valentina Giacinti minn taħt il-lasta bir-ras tefgħet inkreddibilment għoli.
Huma rduppjaw l-iskor fid-79 minuta meta Severini xeħtet cross perfett fil-baxx fid-direzzjoni ta’ SOFIA CANTORE li minn taħt il-lasta tefgħet ġewwa.
It-Taljani skorjaw it-tielet goal fil-85 minuta meta BENEDETTA GLIONNA permezz ta’ xutt fil-baxx mill-viċin għebet lill-goalkeeper Maltija Raisa Costantinoa.
Huma skorjaw ir-raba’ goal żewġ minuti biss wara permezz ta’ auto-goal sfortunat ta’ Mariah Cardona.
L-Italja ssiġillaw ir-rebħa permezz tal-ħames goal fid-89 minuta permezz ta’ xutt minn tarf il-kaxxa ta’ SOFIA CANTORE, biex b’hekk irreġistrat doppjetta personali.
L-Italja komplew jamministraw il-vantaġġ komdu li kellhom sa tmiem il-partita.
Referee: Ioanna Allayiotou (Ċipru)
