Anki jekk mhuwhiex sport li jingħata pubbliċità daqs dixxiplini sportivi oħra bħall-futbol, il-kickboxing qed jikber ferm f’pajjiżna, u l-opportunitajiet – anki barra minn xtutna – ma jonqsux.
Tkellimna mal-kowċ tal-kickboxing Alan Borg, li ilu jippratika dan l-isport sa mill-2001, u wasal Malta ftit tal-jiem ilu minn esperjenza ta’ taħriġ fir-Repubblika Ċeka.
Esperjenza li hija biss ħolqa minn katina t’opportunitajiet barra minn xtutna, hekk kif fix-xhur li ġejjin grupp ta’ Maltin se jerħula lejn Bristol biex f’Settembru jirrapreżentaw lil pajjiżna fil-WUMA World Championship.
Inti li ilek tipprattika l-kickboxing sa mill-2001, tqisu bħala sport biex wieħed iżomm ruħu attiv fiżikament, jew anki bħala self-defense?
Wieħed jista’ jipprattika dan l-isport kemm biex iżomm ruħu fit u jservi utli wkoll anki bħala self-defense. Apparti minn hekk illum il-ġurnata jeżistu ħafna kompetizzjonijiet u b’sodisfazzjon ngħid li l-isportivi tagħna ilhom għal diversi snin jingħataw l-opportunità jikkompetu kemm fuq livell nazzjonali u anki barra minn xtutna waqt World Championships.
Tqisu bħala sport perikoluż?
L-isport tal-kickboxing mhu perikoluż xejn – jew aħjar mhux daqs kemm ipinġuh in-nies li ma jkunu midħla tiegħu. Kwalunkwe sport fih xi tip ta’ periklu, però aħna mgħarrfin u mħarrġa sew fuq is-sigurtà tal-istudenti tagħna. Apparti minn hekk ikunu lebsin kull ħin ilbies protettiv biex nimminimizzaw l-inċidenti.
X’benefiċċji jġib miegħu dan l-isport?
Bla dubju, il-kickboxing irabbi f’kull min jipprattikah, speċjalment min jibda t’età żgħira, sens ta’ kunfidenza. Kunfidenza li eventwalment tgħinhom jaffaċċjaw u jieqfu għall-bullying; u utli ħafna anki fiżikament speċjalment kontra l-obeżità li f’pajjiżna tant għandna rata għolja tagħha.
Huwa sport għan-nisa jew iktar għall-irġiel?
Kwalunkwe arti marzjali, inkluż il-kickboxing, huwa tajjeb biex jiġi pprattikat miż-żewġ sessi.
Jeżistu kompetizzjonijiet fl-isport tal-kickboxing bħal f’dixxiplini oħrajn?
Iva jeżistu, u dan f’kull età. Il-klabb tagħna Wushuky huwa membru uffiċjali fil-WUMA – World United Martial Arts – ibbażat f’Cheltenham fl-Ingilterra kif ukoll affiljat ma’ Sports Malta.
X’opportunitajiet ta’ taħriġ kellek barra minn Malta, u kif tiddeskrivi l-esperjenza?
Dis-sena, bil-kuntatti tajba li bnejna mal-federazzjoni, kelli l-opportunità li nattendi għal taħriġ ta’ kowċing fi Praga. Esperjenza sabiħa mmens fejn bnejt komunikazzjoni bejn il-kowċis stess, studenti u anki l-ġenituri. Jużaw sistema ta’ kowċing fejn jgħafsu ħafna fuq kif atleta jħares u jipprepara għall-isport. Kelli opportunità li nagħmel żewġ sessjonijiet lil Team Praga u b’sodisfazzjon ngħid li laqawni u rċevejt rispons tajjeb ħafna.
Issa ninsabu lesti u qed inħarsu ’l quddiem biex nipparteċipaw fi training camp fi Bristol fl-Ingilterra f’Settembru li ġej biex nirrapreżentaw lil pajjiżna fil-WUMA World Championships.
Nixtieq nieħu spunt u nirringrazzja lis-Segretarju Parlamentari għall-Isport Chris Agius li dejjem kien ta’ għajnuna għal dan l-isport, u lil dawk kollha nvoluti fil-klabb li jiddedikaw tant ħin biex jgħallmu lill-istudenti tagħna. L-isportivi tal-futur.
