Għal dawk li jsegwu dak li jkun għaddej fil-Familja Rjali Ingliża, bħalissa għandhom xalata. Storja li tlaqqmet Mexit – il-ħruġ ta’ Meghan u Harry mill-Familja Rjali – fl-isfond tal-ħruġ tar-Renju Unit mill-Unjoni Ewropea, il-famuża Brexit.
Il-kriżi Mexit għalissa hija konkluża b’kompromess. Harry u Meghan se jgħaddu minn perjodu ta’ tranżizzjoni li matulu jaqsmu ħinhom bejn il-Kanada u r-Renju Unit. Mhix daqstant sempliċi għaliex għad hemm ħafna x’jiġi diskuss u wkoll deċiżjonijiet x’jittieħdu. Imma r-Reġina Eliżabetta espremiet, tal-anqas fil-pubbliku, li tifhem dik li hija x-xewqa tan-neputi.
U l-aktar persuna mill-Familja Rjali kollha li tista’ tifhem lil Harry u Meghan hija proprju r-Reġina Eliżabetta.
Immorru lura 71 sena, lejn l-1949. Il-Prinċipessa Eliżabetta mir-restrizzjonijiet kollha tal-palazz tiġi Malta biex tkun viċin ir-raġel tagħha l-Prinċep Filippu li ngħata l-impenn bħala uffiċjal tar-Royal Navy stazzjonat f’Malta. Meta ġiet Malta l-Prinċipessa Eliżabetta kienet diġà welldet lill-Prinċep Karlu.
Huwa fatt magħruf li r-Reġina Eliżabetta tistqarr li wieħed mill-aktar perjodi li tgħożż huwa proprju dak li matulu hija kienet f’pajjiżna. Perjodu li matulu daqet ftit ‘libertà’, xi ħaġa li qatt ma kienet esperjenzat.
F’Villa Guardamangia f’Tal-Pietà, Eliżabetta setgħet tgħix ħajja totalment differenti minn kif kienet imdorrija. Kważi kważi, kienet tgħix ħajja komuni, tippassiġġa fit-toroq Maltin, issuq il-vettura tagħha waħedha mingħajr serbut ta’ sorveljanza, toħroġ u tiddeverti. Għalhekk taf tajjeb xi tfisser ‘libertà’. U dan il-perjodu seta’ kien, forsi, fattur deċiżiv li wassal lir-Reġina Eliżabetta taċċetta dan il-perjodu ta’ tranżizzjoni ta’ Harry u Meghan, perjodu li jista’ jtawwal għal snin. Perjodu li huwa viċin ħafna tat-tliet snin li għexet f’Malta r-Reġina Eliżabetta, minkejja li hija qatt ma abbandunat id-dmirijiet tal-Kuruna Rjali. Perjodu li kellu jintemm ħesrem mal-mewt ta’ missierha r-Re Ġorġ VI fl-1952.
Mhux ta’ b’xejn li r-Reġina Eliżabetta għandha post speċjali fil-memorji tagħha għal pajjiżna. Anki fl-aħħar żjara li għamlet f’pajjiżna fl-2015 meta attendiet għal-laqgħa tal-pajjiżi tal-Commonwealth, iċ-CHOGM, es
primiet li tqis lil Malta bħala t-tieni dar tagħha! Ir-Reġina Eliżabetta għamlet seba’ żjarat f’Malta, fosthom erba’ żjarat statali.
Imma anki hawn hemm xebh ma’ Meghan. Bużbuż nannitha Mary twieldet proprju f’Malta fl-1862. Meghan ukoll żaret lil pajjiżna fl-2015 u kienet stqarret li ssaħħret bil-ġmiel tiegħu, apparti li ħassitha komda ħafna żżur lil pajjiż l-antenata tagħha. Kienet qalet ukoll li x-xewqa tagħha kienet li terġa’ żżur lil pajjiżna.
Min jaf, forsi għad naraw lil Harry u Meghan u lil Archie jippassiġġaw f’triqatna bħala turisti ‘komuni’.
