Il-leaders Birkirkara ħadu skoss fit-tamiet tagħhom li jzommu l-ewwel post fil-klassifika fi tmiem l-ewwel round tal-Kampjonat meta sfaw megħluba minn Hibernians permezz ta’ goal f’kull taqsima.
Kienet wirja pjuttost diżappuntanti għall-Karkariżi li minkejja li kellhom l-aktar mil-logħob, ftit li xejn dehru effettivi fil-konklużjonijiet tagħhom waqt li Hibernians ħadu ċ-ċansijiet li ġewhom u kisbu t-tliet punti.
Birkirkara taw l-impressjoni li se jiddominaw hekk kif ħarġu fuq l-attakk biex resqu qrib fl-14-il minuta permezz ta’ corner mogħti minn Andrea Zammit li għadda tul il-lasta imma ma sab lil ħadd biex jikkonkludi.
Hibernians ma qagħdux lura u fit-23 minuta Alex Bruno qassam lil Federico Falcone li x-xutt tiegħu ġie mblukkat b’diffikulta’ mill-goalkeeper Karkariż Giacomo Volpe.
Fil-25 minuta Hibernians fetħu l-iskor meta minn azzjoni ta’ corner mogħti minn Jurgen Degabriele kien Kevin Fraga li skorja b’xutt mill-qrib.
Sal-mistrieh Birkirkara tħabtu biex jiksbu l-goal tad-draw imma xejn ma kienu effettivi fl-azzjonijiet tagħhom biex qatt ma mpenjaw serjament lill-goalkeeper Hugo Sacco.
Fit-tieni taqsima kienu Hibernians li ħolqu l-ewwel periklu fl-54 minuta meta l-goalkeeper Volpe tajjar kif seta’ freekick insidjuż mogħti minn Jurgen Degabriele.
Tliet minuti biss wara Alessandro Coppola ssogra meta ttakilja lil Felicio Carvalho li kien jiġi waħdu kieku qabżu bir-referee jindika li d-daħla ta’ Coppola kienet korretta.
Fit-63 minuta l-gowler Hugo Sacco salva dak li deher li seta’ jkun goal għal Birkirkara meta minn corner mogħti minn Andrea Zammit, id-daqqa ta’ ras ta’ Yikpe ixxellfet minn Fraga imma Sacco tajjar fil-ħin.
Birkirkara reġgħu resqu qrib fit-80 minuta meta mill-cross ta’ Leandro Lacunza, Sacco reġa’ ddistingwa ruħu billi salva x-xutt akrobatiku ta’ Manuel Morello.
Ċans ieħor għal Birkirkara wasal fid-90 minuta permezz ta’ xutt ta’ Shaun Dimech salvat tajjeb mill-ġdid minn Sacco.
Bil-Karkariżi jagħfsu sa l-ahhar biex isalvaw ir-riżultat, fit-93 minuta nqabdu żbilanċjati biex is-sostitut Kleiton għadda l-ballun lil Alex Bruno li x-xutt tiegħu ħabat mal-lasta l-mimduda u qabeż il-linja fatali għat-tieni goal Pawlist.
Referee: Trustin Farrugia Cann
Player tal-Loghba: Kevin Rodrigo Fraga (Hibernians)
