Il-Kummissjoni Ewropea rrevediet ’il fuq it-tbassir ekonomiku għal pajjiżna għal din is-sena.
Fit-tbassir li ġie ppubblikat għal dan is-sajf, l-esperti tal-Kummissjoni Ewropea għollew it-tbassir tagħhom għat-tkabbir tal-ġid nazzjonali ta’ Malta, minn erbgħa punt sitta fil-mija għal ħamsa punt sitta fil-mija.
TBASSIR TAL-KUMMISSJONI EWROPEA GĦAL DIN IS-SENA
MINN 4.6% GĦAL 5.6%
Din ir-reviżjoni ’l fuq ta’ punt perċentwal għal pajjiżna hija ogħla minn dak li sar għall-bqija taż-żona ewro, fejn it-tbassir tjieb b’nofs punt perċentwal, jew nofs il-bidla tat-tbassir għal pajjiżna.
Kien hemm ukoll diversi pajjiżi li ma rawx wisq tibdil fit-tbassir mill-Kummissjoni Ewropea.
L-esperti tal-Kummissjoni nnutaw li fl-ewwel kwart ta’ din is-sena, Malta diġà kisbet riżultati ekonomiċi aħjar minn dak previst.
Din kienet waħda mir-raġunijiet għaliex l-esperti ħassew li kellhom jgħollu t-tbassir għal Malta.
Fl-istess waqt innutaw kif l-ottimiżmu u l-kunfidenza fost in-negozji u l-familji tjiebet ħafna.
Fattur ewlieni ieħor li wassal għal dan it-tbassir kien il-pass mgħaġġel li bih mexa l-pjan ta’ vaċċinazzjoni f’pajjiżna flimkien mas-sitwazzjoni tajba tal-imxija. (“the high pace of vaccinations in Malta and the improvement in the public health situation”)
Dan kollu wassal biex il-Kummissjoni kkonkludiet li l-attività ekonomika ta’ Malta tinsab fit-triq lejn irkupru b’saħħtu. (“economic activity is on a path to a solid recovery”)
Element ieħor li jissemma fir-rapport huwa titjib qawwi fil-konsum privat, fosthom bis-suċċess tal-iskema tal-vouchers tal-Gvern. (“strong uptake of government-paid consumption vouchers”)
It-titjib ekonomiku mistenni jkompli jaċċellera matul is-sena d-dieħla, meta l-ekonomija Maltija mistennija tikber b’ħamsa punt tmienja fil-mija wara tkabbir ta’ ħamsa punt sitta fil-mija din is-sena.
Fiż-żona ewro, it-tkabbir mistenni jonqos minn erbgħa punt tmienja fil-mija għal erbgħa punt ħamsa fil-mija.
TBASSIR EKONOMIKU GĦALL-2021
- MALTA: 5.6%
- ŻONA EWRO: 4.8%
TBASSIR EKONOMIKU GĦALL-2022
- MALTA: 5.8%
- ŻONA EWRO: 4.5%
Is-sena d-dieħla f’Malta anki t-turiżmu mistenni jkompli jirranka, u huwa antiċipat investiment qawwi kemm mis-settur privat u anki mis-settur pubbliku. Dwar dan tal-aħħar, l-esperti semmew l-implimentazzjoni tal-Pjan ta’ Rkupru.
Fi stqarrija, il-Gvern laqa’ dan iċ-ċertifikat b’saħħtu għat-tmexxija ekonomika ta’ pajjiżna u nnota kif il-kummenti tal-esperti jikkuntrastaw ħafna mad-diskors negattiv tal-Oppożizzjoni.
Fuq Twitter, il-Prim Ministru Robert Abela qal li bit-tnedija tal-pjan ta’ rkupru, l-istrateġija ta’ wara l-COVID-19 u l-viżjoni ekonomika, in-negozji u l-familji Maltin u Għawdxin jistgħu jħarsu ’l quddiem lejn prosperità ġdida.
