Il-Kummissjoni Ewropea approvat ir-reviżjoni tal-Pjan ta’ Rkupru u Reżiljenza li l-finanzjament għalih ġej minn fondi Ewropej. B’hekk, il-Pjan ta’ Malta huwa fost l-ewwel li ġie rivedut u approvat mill-Kummissjoni.
Dan se jfisser li l-pjan ta’ Malta żdied minn aktar minn €316 miljun għal €328 miljun. Dan il-pjan se jkopri 31 riforma u 16-il investiment.
Il-Pjan ta’ Rkupru ta’ Malta ġie approvat oriġinarjament f’Settembru ta’ sentejn ilu.
Minn dan iż-żmien ’l hawn, il-Kummissjoni Ewropea ħarġet il-pjan imsejjaħ bħala REPowerEU – azzjoni fuq livell Ewropew sabiex tuża aktar enerġija nadifa waqt li l-provvista tal-enerġija tkun waħda sigura. Dan il-pjan tal-Unjoni Ewropea tħabbar minħabba l-kriżi tal-enerġija li qed jaffaċċjaw il-pajjiżi Ewropej, kawża tal-gwerra fl-Ukrajna.
Il-pjan rivedut ta’ Malta jinkludi l-għan li pajjiżna jikkontribwixxi għall-provvista sigura tal-enerġija, billi jsaħħaħ il-grilja tal-elettriku u anki aktar investiment f’enerġija rinovabbli.
Dan il-pjan rivedut ta’ Malta xorta waħda għadu jinkludi fil-maġġoranza tiegħu favur l-ambjent u l-qalba diġitali – dawn jammontaw għal aktar minn 68 fil-mija tal-inizjattivi.
Dan filwaqt li aktar minn kwart tal-inizjattivi huma biex itejbu s-soluzzjonijiet diġitali.
IL-PJAN TA’ RKUPRU U REŻILJENZA TA’ MALTA RIVEDUT
68% FAVUR L-AMBJENT U L-QALBA DIĠITALI
26% BIEX ITEJBU S-SOLUZZJONIJIET DIĠITALI
Meta kien tħabbar dan il-pjan ta’ rkupru flimkien mal-Prim Ministru Robert Abela, il-President tal-Kummissjoni Ewropea, Ursula von der Leyen, sejħet dan il-pjan bħala wieħed favur l-ambjent.
Ursula von der Leyen
“Here the Maltese Plan is outstanding, with 54% investment into the European Green Deal: that’s one of the greenest Recovery Plan we have.”
Intant, b’rabta ma’ dan l-iżvilupp, irreaġixxa l-Prim Ministru Robert Abela, li fuq Twitter qal li huwa sodisfatt li l-Kummissjoni Ewropea laqgħet it-talba ta’ pajjiżna biex dan il-pjan jiġi rivedut.
Dr Abela qal li dan se jfisser li pajjiżna se jagħmel aktar investimenti fl-enerġija rinnovabbli, fosthom post għall-ħażna tal-batteriji fil-Marsa, waqt li jissaħħaħ il-grid tal-elettriku f’pajjiżna.
Qal li dan il-pjan se jwassal biex issir riforma se tiffoka fuq simplifikazzjoni ta’ proġetti ta’ enerġija rinnovabbli, waqt li ssir obbligatorja l-installazzjoni ta’ enerġija li ġejja mix-xemx għal ċertu binjiet ġodda.
