Fl-ewwel sena tiegħu bħala Kummissarju għall-Istandards fil-Ħajja Pubblika, Dr George Hyzler rċieva 29 ilment.
Dan intqal fl-ewwel rapport anwali tiegħu fejn ġie spjegat li 7 minn dawn l-ilmenti ma setgħux jiġu investigati.
Sal-aħħar tal-2019 il-Kummissarju ikkonkluda 11-il investigazzjoni.
Huwa sab li 3 ilmenti kienu ġustifikati filwaqt li 6 ma kienux.
F’każ ieħor, l-investigazzjoni tal-Kummissarju kienet inkonklussiva filwaqt li fl-aħħar każ mill-ħdax li ġew konklużi, il-Kummissarju iffoka l-investigazzjoni tiegħu dwar prattika ġenerali mhux dwar imġieba ħażina min-naħa ta’ individwu partikolari.
Ir-rapport annwali jagħti rendikont ta’ xogħol ieħor li wettaq il-Kummissarju għall-Istandards sal-aħħar tal-2019. Fost affarijiet oħra, il-Kummissarju beda reviżjoni tal-kodiċi ta’ etika li japplikaw għall-ministri u d-deputati parlamentari.
Il-kariga ta’ Kummissarju għall-Istandards fil-Ħajja Pubblika nibtet minn wegħda tal-Partit Laburista u fost oħrajn wasslet biex il-Kummissarju jinvesta d-dikjarazzjoni tal-assi tal-Ministri u d-Deputati u jinvestiga każi ta’ mgieba ħażina u ksur tal-etika.
Turiha ċara tal-impenn minn Gvern Laburista favur it-trasparenza u s-Saltna tad-Dritt f’pajjiżna.
Intant il-whip tal-Gvern Glenn Bedingfield talab lill-Kummissarju għall-Istandards fil-Ħajja Pubblika biex jinvestiga l-aġir ta’ Jason Azzopardi li skont id-deputat Laburista inqeda bil-privileġġ parlamentari biex jattakka l-integrità ta’ imħallef f’diskors li sari l-ġimgħa l-oħra.
