Hekk kif fi ftit jiem il-Kap Nazzjonalista Bernard Grech qed ifittex konferma b’saħħitha bħala Kap mal-Kunsilliera Nazzjonalista, bħalissa jinsab qed jaqlagħha minn kullimkien u l-akbar akkuża hi li moħħu biss biex isalva hu.
Kien b’dan il-mod li l-gazzetta Kullħadd iddeskriviet is-sitwazzjoni tal-Kap Nazzjonalista Bernard Grech hekk kif ħafna qed jgħidu li qed jaħsad dak li żera’.
Madankollu hawn jingħad li huwa ġietu tajba biss u qed itellaq waħdu għall-kariga ta’ Kap għaliex bid-diżastru li ħalla qatel kull aptit li xi ħadd jitħajjar imexxi lill-Partit Nazzjonalista bħalissa.
Fil-fatt, il-gazzetta Kullħadd tirrapporta kif l-aħħar jiem kienu jiem ta’ tensjoni kbira fl-uffiċini tal-Kap u dawk l-aktar qrib tiegħu tant li bħalissa Bernard Grech jinsab iċempel u jiltaqa’ mal-kunsillieri tal-Partit minkejja li se jtellaq waħdu.
Dan fid-dawl ta’ attakki miż-żewġ fazzjonijiet li jiddominaw id-Dar Ċentrali fl-aħħar jiem.
Sors tal-Kullħadd, jgħid mal-gazzetta li “dak li deher fil-pubbliku hu biss nitfa minn dak li qed jiġri.” Hu jgħid ukoll kif bħalissa l-ġlieda fid-Dar Ċentrali hi dwar min se jkollu l-pussess assolut fuq l-uffiċċju tal-istess Kap.
“Is-sitwazzjoni tinsab bla kontroll. Għandek dawk li dejjem kienu fil-fazzjoni l-oħra, dawk li jappoġġjaw lil (Adrian) Delia. “Dawn se jagħtu d-daqqa fejn jeħtieġ,” Imbagħad għandek dawk li għamlu lil Grech Kapu li sa ċertu punt għadhom iwerwruh. Imma issa, fl-istess ħin, dawn qed jiftħu attakk totali fuq in-nies li kienu u għadhom madwar il-Kap.” Komplew l-imkejjen tal-Kullħadd fid-Dar Ċentrali.
Hekk kif il-Kullħadd kompliet tistaqsi dwar l-akbar problema li għandu Bernard Grech, is-sorsi tal-Kullħadd sostnew li l-Kap jinsab interessat biss jibqa’ Kap tal-Oppożizzjoni biex iżomm l-istatus, l-uffiċċju u x-xufier u jerġa’ jieħu ċans li jsir Prim Ministru.
Fil-fatt, jirriżulta lill-Kullħadd li anke dawk, li sa ftit ilu kienu jitħallsu l-eluf kbar mid-Dar Ċentrali għall-Kap, huma urtati għall-mod kif dan issa qed iħallihom ifendu għal rashom.
