Il-kriżi tal-enerġija għadha fuq nett tal-aġenda tal-Unjoni Ewropea. Huwa għalhekk li l-Ġimgħa se ssir laqgħa urġenti tal-Kunsill tal-Ministri tal-Enerġija tal-Unjoni Ewropea. Il-laqgħa se ssir fir-Repubblika Ċeka, li bħalissa għandha fi jdejha l-Presidenza tal-Kunsill tal-Unjoni Ewropea. F’isem Malta se tieħu sehem il-Ministru għall-Ambjent, l-Enerġija, u l-Intrapriża, Miriam Dalli.
Din il-laqgħa se tiddiskuti l-proposta tal-Unjoni Ewropea biex jitnaqqas il-konsum tal-elettriku. Dan wara li, f’Lulju, il-Kunsill qabel dwar tnaqqis ta’ ħmistax fil-mija fil-konsum tal-gass biex jipprova jtaffi l-problema tal-provvista li hemm bħalissa u li mistennija teskala fix-xitwa li ġejja, hekk kif jiżdied il-konsum tal-gass minħabba t-tisħin. F’dan il-każ, Malta rnexxielha tikseb deroga minn dan it-tnaqqis obbligatorju.
Apparti minn hekk, l-Unjoni Ewropea qed taħseb li jkun hemm tnaqqis addizzjonali tal-konsum tal-enerġija – fil-mira din id-darba hemm il-konsum tal-elettriku, li madwar l-Ewropa laħaq prezzijiet straordinarji. Il-mira hi li jkun hemm tnaqqis ta’ 10 fil-mija fil-konsum tal-elettriku.
Fid-dawl ta’ dan, tħabbar li, minn Diċembru sa Marzu li ġej, il-pajjiżi membri tal-Unjoni Ewropea jridu jaraw li jitnaqqas il-konsum waqt is-sigħat li fihom il-prezz ikun l-iktar għoli.
F’dawk is-sigħat, it-tnaqqis fil-konsum għandu jkun ta’ 5 fil-mija tal-elettriku gross meta kkomparat mal-ħames snin li għaddew.
Dan mistenni jaffettwa l-kompettitività tal-intrapriżi u saħansitra joħloq telf ta’ produzzjoni li jista’ jirriżulta f’telf ta’ eluf ta’ impjiegi madwar l-Ewropa kollha.
Dwar dan tkellmet il-Ministru għall-Ambjent, l-Enerġija, u l-Intrapriża, Miriam Dalli, f’kummenti mal-midja.
“Ma nistgħux nagħmluha f’pajjiżna. Il-fatt li aħna pajjiż elettrifikat ħafna kkumparat ma’ pajjiżi oħra – li pereżempju anki biex isaħħnu djarhom għandhom pajpijiet tal-gass iwasslu dik l-enerġija fid-djar – dik xi ħaġa li aħna m’għandniex. Il-fatt li l-industrija tagħna hija elettrifikata ħafna wkoll, il-fatt li l-produzzjoni tagħna tal-ilma tiddependi ħafna mill-elettriku. Qegħdin nagħmlu l-każ tagħna u dan huwa każ li se nkunu qegħdin ninnegozjaw dwaru b’saħħitna biex dak it-tnaqqis mandatorju ma jkunx japplika għal pajjiżna minħabba ċ-ċirkustanzi tagħna.”
Apparti dawn, l-Unjoni Ewropea qed taħseb ukoll biex ikun limitat il-prezz ta’ ċerti sorsi ta’ enerġija, fosthom dik rinnovabbli, nukleari, biż-żejt, u bil-faħam. Il-ħsieb hu li l-ammont li kull Stat jirnexxielu jiffranka fl-ispiża tal-elettriku minn dawn is-sorsi jingħadda lill-kumpaniji tal-elettriku biex jitnaqqas il-prezz lill-konsumaturi.
Fil-każ ta’ Malta, dan ma japplikax għax pajjiżna m’għandux ġenerazzjoni miż-żejt jew mill-faħam, jew enerġija nukleari, u l-pannelli fotovoltajiċi qegħdin, fil-biċċa l-kbira, fuq il-feed-in-tariff. B’riżultat tad-deċiżjonijiet tal-Gvern, il-familji u n-negozji Maltin ma esperjenzaw l-ebda żieda fit-tariffi tal-elettriku.
Diversi Stati membri, fosthom Malta, qed jimbuttaw ukoll għal limitu fuq il-prezz tal-gass. Il-ħsieb huwa li l-elettriku li jiġi ġġenerat mill-gass ma jibqax bil-prezzijiet esaġerati li hemm bħalissa.
L-idea li l-iktar li qed tikseb appoġġ hija dwar limitu fil-prezzijiet li jkun dinamiku b’tali mod li l-Ewropa xorta tibqa’ suq attraenti għall-produtturi tal-gass naturali likwefatt – l-LNG – iżda li tevita l-ispekulazzjoni li hemm fis-suq bħalissa.
Malta tgawdi minn ftehim fit-tul għall-provista tal-LNG bi prezz irħis, imma xorta hija esposta għal prezzijiet għolja għall-elettriku li timporta mill-interconnector mal-Italja, li jlaħħaq ma’ 20 fil-mija tad-domanda mazzjonali.
Fil-laqgħa tal-Kunsill tal-Unjoni Ewropea l-Ġimgħa mistennija ssir ukoll diskussjoni dwar is-sitwazzjoni li żviluppat din il-ġimgħa: dik tal-ħruġ tal-gass minn pipelines Russi li jissupplixxu l-enerġija lejn il-Ġermanja.
