Wara s-suċċess tat-tim Malti tan-nisa tal-futbol ilbieraħ ġie promoss għal-League B tal-UEFA Nations League b’rebħa ta’ 2 b’1 fuq il-Latvja, ONE News ħa r-reazzjoni tal-President tal-Malta Football Association, Bjorn Vassallo, u l-kowċ tal-istess tim Manuela Tesse.
Għalkemm it-tim Malti mar l-ewwel fi żvantaġġ, kienu l-plejers Kailey Willis u Maria Farrugia, li dawru telfa f’rebħa ta’ tnejn b’wieħed.
Anke jekk punt wieħed kien ikun biżżejjed biex Malta tagħmel l-istorja u tispiċċa fl-ewwel post tal-grupp tagħha, din ir-rebħa ġabet sodisfazzjon akbar u prestiġju bla preċedent għall-futbol Malti, li paxxa lill-eluf ta’ partitarji preżenti fil-Grawnd taċ-Ċentinarju f’Ta’ Qali u dawk li segwew il-logħba diretta fuq it-televiżjoni.
Dwar is-suċċess miksub ilbieraħ, il-kowċ tat-tim nazzjonali Malti tan-nisa tkellmet b’mod pożittiv ferm dwar il-prestazzjonijiet matul il-kampjonat. Mal-mikrofonu ta’ ONE News stqarret x’se tkun it-triq ’il quddiem fil-fażi li jmiss.
“For me the players need to understand that they are strong, everything is possible and I was sure that a small country as Malta now are going to be big and now are going to play with very strong teams in Europe and so for me this is the way that they have to believe and they have to work to achieve what they want.”
Lil Tesse staqsejniha jekk l-iskor finali kienx affetwat bil-fatt li fit-tim nazzjonali Malti hemm plejers li għandhom esperjenza vasta barra minn Malta.
“We have a lot of Maltese players playing in Malta and they can play abroad but they choose to stay here because they love the country, because they have other priorities for sure that who plays abroad help because we have a lot of players playing in very top clubs.”
Fl-ewwel reazzjoni wara dan is-suċċess, Bjorn Vassallo tenna li r-riżultat għaqqad lill-pajjiż kollu.
“Naħseb hija xi ħaġa sabiħa, xi ħaġa li għaqqdet il-pajjiż kollu, xi ħaġa li konna qed nistennewha fis-sens illi konna ilna niddominaw dan il-grupp mill-bidu tiegħu. It-tfajliet tagħna kienu determinati taw kollox biex naslu għal dan l-objettiv. Naħseb li l-mertu kollu huwa tagħhom u tal-istaff tekniku. Naħseb li wrejna li konna ppreparati tajjeb, ilna nagħmlu progress fil-futbol femminili u nixtieq allura dak l-investiment kollu, ix-xogħol kollu li bdejna, li finalment isarraf f’dawn il-prestazzjonijiet u riżultati fuq il-pitch, għax naħseb li t-tfajliet tagħna ħaqqhom.”
Fl-aħħarnett, staqsejna lill-President tal-MFA jekk jaħsibx lit-tim nazzjonali Malti tal-irġiel jistax jikseb suċċess simili bħal dan.
“Il-futbol tal-irġiel qed ninvestu l-istess ħaġa, nagħmlu ħafna affarijiet li nemmnu li għandhom iwassluna biex naslu wkoll għall-objettivi li għandna. Għandna Nations League ukoll bħalma kellna tan-nisa din is-sena li ġejja u għaliex le, nagħmlu dak kollu possibbli. Persważ li l-iskwadra ħa tagħmel dak kollu possibbli biex nerġgħu wkoll nirrepetu dak li għamilna fil-femminili, issa wkoll fil-maskili u allura f’sentejn back-to-back jekk Alla jrid inkunu għamilna żewġ affarijiet kbar ukoll għal pajjiżna u għall-futbol tagħna.”
