Il-Koalizzjoni għal Għawdex irribattiet stqarrija tal-Partit Nazzjonalista, li ddefendiet lill-Kelliem Ewlieni tiegħu Alex Borg dwar il-kwistjoni tal-Forti Chambray, waqt li esprimiet id-dubji tagħha kemm din kellha l-approvazzjoni ta’ kulħadd, kif kien indikat.
Partikolarment fejn qalet li kandidati u deputati Għawdxin tal-istess Partit kienu diġà qablu magħha fit-talba lis-Sovrintendenza tal-Wirt Kulturali u l-Awtorità tal-Ippjanar biex jiġu salvati u ppriservati l-barracks ta’ żmien l-Ingliżi fl-istess forti.
Fl-aħħar jiem il-Koalizzjoni għal Għawdex esprimiet id-diżappunt sħiħ tagħha dwar l-involviment tal-Kelliem Ewlieni Nazzjonalista Alex Borg fil-proġett ta’ Forti Chambray.
Il-Partit Nazzjonalista ftit sigħat wara kkundanna lill-koalizzjoni ta’ tliet għaqdiet ambjentali Għawdxin dwar dak li sejjaħ misinformazzjoni dwar Fort Chambray. Iżda fi stqarrija oħra, il-Koalizzjoni għal Għawdex tenniet li tinsab xxokkjata b’din ir-risposta Nazzjonalista.
Il-Koalizzjoni kienet inizjalment qalet li mhux biss kienet sorpriża kif Borg kien minn ta’ quddiem nett biex jippromwovi l-proġett, iżda wkoll fejn għamel diversi dikjarazzjonijiet żbaljati u gideb sfaċċat.
Ir-risposta tal-PN kienet waħda immedjata biex tiddefendi lil Alex Borg, bi stqarrija intitolata “Ikkundannata l-misinformazzjoni rigward Fort Chambray u l-attakki fuq Alex Borg”, fejn ingħatat l-impressjoni li kellha l-appoġġ tal-Partit kollu kemm hu.
L-għaqdiet ambjentali, fit-tieni stqarrija, qalu li dan hu pjuttost stramb ladarba d-deputat Nazzjonalista Chris Said, flimkien mal-kandidati Beppe Galea, Luke Said, Norma Camilleri u Dr Frank Anthony Tabone, ilkoll iffirmaw it-talba tal-Koalizzjoni għal Għawdex favur il-protezzjoni tal-barracks tal-Ingliżi.
Għaldaqstant staqsiet jekk l-istess deputat u kandidati tal-Partit Nazzjonalista ġewx informati minn qabel b’din l-istqarrija u jekk kinux qed jaqblu magħha.
L-NGOs qalu li huma lesti biex, għall-ġid tal-ambjent Għawdxi, ipoġġu u jiddiskutu ma’ kulħadd u kull awtorità.
