Sitt xhur wara lir-Rabtin qamu maħsuda bl-aħbar sfronda s-saqaf tal-Knisja ta’ Ġieżu, ix-xogħlijiet jinsabu fl-aħħar fażijiet qabel mal-Knisja terġa’ lura għall-glorja tagħha.
One News żar dan is-santwarju mmexxi mill-Arċikonfraternità li qed jitħejja biex il-festa ta’ San Ġuzepp din is-sena tiftaħ bil-kbir il-Ħamis l-ewwel ta’ Marzu.
Fil-jiem tal-festa, se jiġu inawgurati s-saqaf u l-presbiterju l-ġodda u ssir il-konsagrazzjoni tal-altar il-ġdid.
Il-gwardjan tal-Komunità Frangiskana Patri Martin Coleiro qal li fis-sitt xhur li għaddew saret ħidma lejl u nhar biex tlestew ix-xogħlijiet ta’ restawr. Qal li din l-esperjenza qarsa nbidlet f’turija ta’ kemm ir-Rabtin huma nies solidali u għandhom għal qalbom il-patrimonju tagħhom.
Sostna li r-Rabtin mhux biss raw li kollox jitranġa iżda jsir aħjar milli qatt kien.
F’ċerimonja li se titmexxa mill-Arċisqof ta’ Malta fil-preżenza tal-ogħla awtoritajiet tal-pajjiż mistennija tinkixxef il-pittura l-ġdida tas-saqaf, xogħol l-artist żagħżugħ Adonai Camilleri Cauchi.
Ma’ One News, iż-żagħżugħ qal li l-pittura riedet iddur mal-figura ta’ Ġesu Kristu minħabba lill-Patrijiet Franġsikani huma mlaqqma bħala ‘Ta’ Ġieżu; laqam li ġabu magħhom minn Sqallija.
Il-marmista Ronnie Pisani li sibnih ilesti l-aħħar xogħlijiet spjega kif l-altar il-ġdid huwa replika ta’ dak oriġinali li nqered fil-lejl tat-tlieta u għoxrin ta’ Awissu. Qal madankollu l-artal il-ġdid għandu partikolarità li se tiġbed l-għajn.
L-artist Adonai Camilleri Cauchi ħadem bl-istil sotto in su; stil li ilna ma naraw biex jagħti dimensjoni speċjali bħal qisek qed tħares lejhn il-ġenna.
Is-Sur Pisani qal li l-akbar sfida kienet li jinstab irħam li jaqbel mal-kumplament tal-presbiterju minħabba li dan ilu mibni mijiet ta’ snin.
F’dawn ix-xhur li kien għaddej ix-xogħol fuq ġewwa tal-Knisja sar xogħol ta’ kostruzzjoni fuq in-naħa ta’ barra biex ir-Rabtin qatt ma’ jerġgħu jgħaddu minn din l-għafsa ta’ qalb.
Il-Festi ta’ San Ġużepp ta’ din is-sena se jiġu ċċelebrati b’pompa kbira hekk kif għaddej ukoll ix-xogħol ta’ restawr fuq l-istatwa storika ta’ San Ġużepp ix-Xiħ.
Ir-restawr se jiġi inawgurat fit-tnejn ta’ Marzu fil-Katidral tal-Imdina u l-Ħadd erbgħa ta’ Marzu meta l-istatwa terġa’ tidħol fis-santawarju tagħha fir-Rabat proċessjonalment.
Il-Knisja ta’ Ġieżu meta ġara l-inċident
Dettall mill-pittura ta’ Adonai Camilleri Cauchi
