“Il-klieb u l-qtates fl-istess sodda miegħek jaf itelfulek raqda tajba”

• Għandek tqum fl-istess ħin kuljum
• Matul il-ġurnata tqatta’ ħin għad-dawl
• Tagħmel eżerċizzju fiżiku
• Evita’ li tikkonsma kaffeina wara nofsinhar
  

Dawn huma uħud mir-rakkomandazzjonijiet għal persuni li għandhom ‘il fuq minn 50 sena skont ir-rapport tal-Global Council on Brain Health. Dawn ir-rakkomandazzjonijiet għandhom l-għan li persuna ta’ etá medja ma ssibx aktar diffikultá biex torqod matul il-lejl.

Ir-rapport jgħid li aktar ma nikbru aktar naffaċċjaw diffikultá biex nieħdu raqda tajba matul il-lejl u li għalhekk jeħtieġ li nsegwu dawn il-linji gwida. Fost oħrajn jissuġġerrixxu li persuna ta’ etá medja u l-anzjani m’għandhomx jikkunsmaw café jew te wara nofsinhar u li m’għandiex torqod aktar minn nofs siegħa matul il-ġurnata.

Persuni li għandhom ‘il fuq minn 50 sena għandhom ukoll jevitaw li jikkunsmaw l-alkoħol qabel jorqdu hekk kif il-ġisem idum bejn sagħtejn u tliet sigħat biex jelimina l-alkoħol u għalhekk jaf iżommok imqajjem meta jkun sar il-ħin biex torqod jew saħanistra jqajjmek matul il-lejl. L-istess għandhom jagħmlu dawk li jpejpu, ir-rapport jissuġġerrixxi li għandek tevita li tpejjep bejn erba’ u sitt sigħat qabel tidħol torqod.

Biex persuna tistrieħ u tħossha tajba mentalment għandha torqod bejn seba’ u tmien sigħat kull lejl. Fost ir-rakkommandazzjonijiet insibu wkoll li persuni li jraqqdu l-annimali magħhom fis-sodda m’għandhomx jagħmlu dan jekk b’xi mod jew ieħor iqajmuhom matul il-lejl. Il-kamra tas-sodda għandha ukoll tintuża biss għall-irqad u għalhekk m’għandekx tuża’ l-mobajl, tara t-televiżjoni jew taqra l-imejls x’ħin tidħol f’din il-kamra, skont ir-rapport.