Wara l-avvenimenti li seħħew waqt ir-Regatta ta’ Jum il-Ħelsien tat-Tnejn li għadda, il-klabb tar-Regatta tal-Isla ħareġ stqarrija uffiċjali. Fl-istqarrija l-klabb ikkonferma li se jkunu qed jieħdu passsi legali u qed jistennew li l-organizzazjoni tirrimedja dik li qed isejjħu bħala ‘inġustizzja’ b’mod ġust u xieraq. Hawn taħt l-istqarrija tal-klabb tal-Isla:
STQARRIJA UFFIĊJALI: KLABB TAR-REGATTA ISLA
Bħala Klabb, wasalna għall-konklużjoni ċara li ġejna miċħuda mir-rebħ tax-Shield ta’ din ir-regatta b’mod inġust, minħabba ksur tar-regolamenti, ksur tal-liġi u atti ta’ intimidazzjoni—li kienu xhieda tagħhom kulħadd—min-naħa ta’ klabb ieħor, Bormla Regatta Club. Dan jikkonċerna biss ir-Regatta tal-Kategorija A.
Sa tmiem it-tieni tiġrija, diġà konna f’vantaġġ b’saħħtu, wara li rbaħna l-ewwel tiġrija u spiċċajna fit-tieni post fit-tieni waħda. F’dak il-mument, diġà kellna vantaġġ ta’ 12-il punt fuq Birgu, li kienu fit-tieni post. Fit-tielet tiġrija, id-Dgħajsa tal-Pass ta’ Żewġ Mqadef, għamilna prestazzjoni dominanti oħra u ksibna rebħa oħra. Din ir-rebħa kabbret il-vantaġġ tagħna għal 24 punt fuq Bormla, u b’hekk ir-rebħ tax-Shield kien qed jidher aktar ċar li qed joqrob lejn il-klabb tagħna, Senglea.
Madankollu, wara din it-tiġrija—meta r-riżultati uffiċjali kienu diġà ġew ippubblikati fuq il-midja soċjali tal-organizzazzjoni—Bormla Club għamel azzjoni inġustifikata u anti-sportiva. Huma ordnaw lil xi qaddiefa tagħhom sabiex ipoġġu d-dgħajjes tagħhom f’nofs il-korsa tat-tiġrija, b’mod deliberat biex iwaqqfu aktar tiġrijiet. Fl-istess ħin, grupp ta’ membri tagħhom marru direttament fuq il-Valletta Waterfront, fejn kienu preżenti l-organizzaturi u d-delegati tal-klabbs, u bdew jipprotestaw b’insulti, kliem dispreġġjattiv, għajjat u mġieba oħra mhux xierqa. Ftit wara, Birgu segwa l-istess eżempju, bagħat dgħajsa tiegħu u ngħaqad mal-protesta ta’ Bormla.
Malli ġejna nfurmati mir-rappreżentant tagħna fuq il-post, morna minnufih hemmhekk. Dak li seħħ minn hemm ‘il quddiem kien ksur sfaċċat tar-regolamenti stabbiliti, fejn ir-regoli ġew mgħawġa, oħrajn injorati, u miksura kompletament.
Ksur tar-Regolamenti:
A) Il-protesti mhumiex permessi waqt ir-regatta.
- Skont ir-Regola 7.6, l-ebda klabb ma jista’ jippreżenta protest waqt li rregatta tkun għadha għaddejja. Jekk klabb jixtieq jilmenta, għandu jagħmel dan billi jissottometti rapport fi żmien 15-il jum wara t-tmiem tar-regatta.
- Minflok ma ordnaw lil Bormla jneħħu d-dgħajjes tagħhom u jħallu t-tiġrija tkompli, l-organizzazzjoni b’mod ta’ ksur tar- regoli tagħom stess sejħet il-bord tekniku biex jisma’ l-protesta tagħhom—bi ksur dirett tar-Regola 4.2.
B) Il-bord tekniku għandu jinġabar biss f’każijiet eċċezzjonali.
- Ir-Regola 4.2 tgħid b’mod ċar li l-bord tekniku għandu jissejjaħ biss f’sitwazzjonijiet eċċezzjonali, bħal mewt jew maltempata estrema waqt ir-regatta. Dan ma kienx il-każ.
C) Ġejna ordnati b’mod inġust biex nerġgħu nibdew it-tiġrija.
- L-ebda regolament ma jippermetti li tiġrija terġa’ tibda taħt dawn iċ-ċirkostanzi.
- Iċ-Chief Judge naqas milli jinforza r-Regola 3.13, li tgħid b’mod ċar li jekk ikun hemm kolliżjoni fl-ewwel 200 metru tat-tiġrija, l-Water Judges għandhom minnufih iwaqqfu t-tiġrija, jdoqqu l- horn b’mod kontinwu, u jimblukkaw il-korsa
biex jikkonfermaw id-deċiżjoni tagħhom. Xejn minn dan ma sar. Minflok, it-tiġrija tħalliet tkompli kollha mingħajr interferenza, u fl-aħħar ġie ddikjarat b’mod uffiċjali li Senglea kienet ir-rebbieħa ta’ dik it-tiġrija.
- L-organizzazzjoni naqset ukoll milli tinforza r-Regola 3.20, li tagħtiha l-awtorità li twaqqaf tiġrija f’kull stadju jekk ikun hemm bżonn. L-Water Judges ma raw l-ebda ksur tar-regoli u ppermettew lit-tiġrija tkompli sal-konklużjoni tagħha.
- Id-dgħajjes kollha—inkluż dawk ta’ Bormla—komplew it-tiġrija tagħhom mingħajr interruzzjoni.
- It-tiġrija waslet għat-tmiem tagħha b’mod uffiċjali, u Senglea ġiet iddikjarata r-rebbieħa.
- L-organizzazzjoni ppubblikat uffiċjalment ir-riżultat, u dan għandu jibqa’ fis-seħħ.
Huwa wkoll importanti li jiġi enfasizzat b’mod qawwi li wara li l-bord aċċetta b’mod inġust il-protesti ta’ Bormla u Birgu u ordna li t-tiġrija terġa’ ssir, l-istess qaddiefa taż-żewġ klabbs — flimkien ma’ dawk ta’ Senglea — għażlu li jaqdfu taħt protesta u b’mod ċar ħallew lill-kompetituri l-oħra jispiċċaw it-tiġrija bla sfida, u b’hekk wrew biċ-ċar li lanqas huma ma kienu jaqblu mad-deċiżjoni li ttieħdet mill-bord.
Minħabba dan il-ksur ċar tar-regoli, (il-klabb tar-Regatta tal-Isla) se nkunu qegħdin nieħdu passi legali kontra l-partijiet kollha responsabbli. Barra minn hekk, qed nistennew li l-organizzazzjoni tirrimedja din l-inġustizzja b’mod ġust u xieraq.
