Il-Klabb tar-Regatta ta’ Bormla s-sibt wara nofs-in nhar ħareġ stqarrija b’reazzjoni għall-istqarrija tal-bieraħ mill-Klabb tar-Regatta tal-Isla. Fl-istqarrija tal-lum, Bormla ċaħdu l-akkużi li għamlu fil-konfront tagħhom l-Isla, filwaqt li qalu li jinsabu lesti li jżommu lill-Klabb Regatta Senglea responsabbli għal xi danni li jista’ jsofri l-klabb tagħna aktar ’il quddiem.
STQARRIJA MILL-KLABB TAR-REGATTA TA’ BORMLA:
Fid-dawl tal-fatti, wara l-istqarrija maħruġa mill-Klabb Regatta Senglea, li qiegħda tiċċirkola fuq il-midja f’ dawn il-mumenti, il-Klabb Bormliż iħoss li għandu jiċċara l-pożizzjoni tiegħu u jgħid il-fatti kif ġraw tassew fir-Regatta tal-31 ta’ Marzu. L-istqarrija tal-klabb Senglean hija mimlija gideb, insinwazzjonijiet infondati u bla bażi kif jistgħu jixhdu d-delegati u l-uffiċjali li kienu fuq il-post dak il-ħin stess. Klabb Regatta Bormla qiegħed janalizza u jiġbor l-informazzjoni relevanti kollha u qiegħed jieħu pariri legali sabiex jissalvagwardja u jħares l-interessi tal-klabb Bormliż.
Klabb Regatta Bormla ser iżomm lill-Klabb Regatta Senglea u individwi oħra responsabbli ta’ dawn l-insinwazzjonijiet u qlajjiet foloz, li l-interess tagħhom huwa li jħammgu u jtappnu r-reputazzjoni tal-Klabb tagħna.
L-istqarrija maħruġa mill-Klabb Senglean hija mimlija tgħawwiġ tal-fatti, u malafama, li l-intenzjoni tagħha hija li tpoġġi dell ikrah fil-konfront tal-Klabb tagħna, u anke Klabbs oħra u d-delegati tagħhom li qdew dmirhom sabiex jissalvagwardjaw id-drittijiet tal-Klabbs tagħhom, skond ir-regolamenti tal-Għaqda Regatta Nazzjonali. Hija gidba sfaċċata li diriġenti tal-Klabb ippruvaw jintimidaw jew jagħmlu xi tip ta’ monopolju u pressjoni biex titieħed id-deċiżjoni li t-tiġrija tal-kategorija open tal-pass b’ żewġ imqadef terġa’ ssir. Din il-pressjoni ma kienx hemm bżonnha għax kulħadd jaf ir-regolamenti li jgħidu li fejn ikun hemm ħabta qabel il-mitejn metru t-tiġrija għandha tieqaf u terġa’ tibda. Gidba oħra f’din l-istqarrija tal-klabb Senglean hija li ħareġ ir-riżultat uffiċjali meta kulħadd jaf li biex joħroġ riżultat uffiċjali fit-tiġrija ta’ bi tnejn irid isir l-użin tad-dgħajjes u wara jitellgħu l-bnadar tad-distretti li jidħlu fl-ewwel tliet postijiet. L-użin qatt ma sar u lanqas it-tlugħ tal-bnadar u dan il-klabb Senglean jafu tajjeb u dan kollu jista’ jiġi kkonfermat mill-Għaqda. Saħansitra l-klabb Senglean kien jaf li din it-tiġrija ma saritx skont ir-regolamenti u aċċetta u fil-fatt bagħat id-dgħajsa tiegħu biex din it-tiġrija terga’ tiġi ripetuta.
Il-klabb tagħna u d-diriġenti tiegħu dejjem imxew mar-regolamenti u mal-istruzzjonijiet li ngħataw mill-Għaqda Regatta Nazzjonali u hawn ta’ min jgħid li d-diriġenti tal-Klabb tagħna ma għamlu xejn iktar milli għamlu id-diriġenti ta’ Klabbs oħra li dak il-ħin kelhlom l-interess, inkluż id-diriġenti mill-Klabb Senglean stess. L-uffiċjali Sengleani wkoll qasmu l-port fuq dgħajsa bħalma għamlu l-uffiċjali tagħna u ta’ klabbs oħra u dan bir-raġun kollu għax id-distretti tagħna qegħdin in-naħa l-oħra tal-port.
Dawn huma kollha fatti li ma jista’ jmerihom ħadd. Żgur li episodji bħal dawn ma jagħmlux la ġid u lanqas ġieħ lill-isport tradizzjonali tagħna. Madanakollu il-Klabb tagħna dejjem se jibqa’ ffukat u jħares ’il quddiem għax jaf x’potenzjal għandu biex jirbaħ l-unuri. Ħadd u xejn mhu se jwaqqaf il-klabb tagħna billi jipprova jħammeġ u jostakola bħalma ġara f’dan il-każ u aħna lesti li nżommu lill-Klabb Regatta Senglea responsabbli għal xi danni li jista’ jsofri l-klabb tagħna aktar ’il quddiem.
