F’intervista mxandra fuq l-istazzjonijiet ONE il-Prim Ministru Robert Abela għamel elenku tal-kisbiet li kiseb dan il-Gvern.
Dr Abela irrifletta fuq l-aħħar għaxar snin bħala żmien li fihom il-poplu għażel bidla għall-aħjar u llum il-ġurnata qiegħed igawdi l-frott.
Fil-fatt, huwa aċċenna għall-istatut tal-Partit Laburista li jitkellem dwar il-prinċipju tal-ġustizzja soċjali li xpruna l-mod ta’ kif ħadem Gvern Laburista.
Robert Abela saħaq ukoll l-importanza li nkomplu nibnu fuq it-tajjeb li għamilna iżda nirriformaw fejn meħtieġ.
“Naqbad il-miżuri biss li għamilna mill-2020 ‘l quddiem. Għamilna riformi hemmhekk aħna illi dan il-pajjiż mhux biss kien għatxan għalihom imma irrivulozzjonajna kif jaħdmu l-istituzzjonijiet tagħna.”
Dr Abela tkellem ukoll dwar il-kisbiet ta’ pajjiżna fejn jidħlu d-drittijiet ċivili li kienu fost ir-riformi importanti li saru fl-aħħar snin biex pajjiżna illum huwa mudell għal pajjiżi oħra.
Il-Mexxej Laburista għamel ukoll referenza għal ħemel ta’ kisbiet f’diversi oqsma li tejbu l-kwalità tal-ħajja tan-nies minn aspett finanzjarju.
Hawnhekk fakkar fiż-żidied sostanzjali fil-pensjonijiet, is-servizz tat-trasport pubbliku b’xejn għal kulħadd, iż-żieda fl-istipendji u t-tneħħija tal-miżata għall-eżamijiet tal-istudenti.
Dr Abela innota wkoll x’qed jiġri barra minn xtutna b’mod partikolari fir-Renju Unit fejn qed isiru proposti għal miżuri li f’pajjiżna ilhom is-snin u kienu ċ-ċavetta għat-tkabbir ekonomiku għaliex ressqu aktar nies lejn id-dinja tax-xogħol.
“Kont qed naqra x’qed jipproponi l-Partit Laburista fl-Ingilterra. Qiegħed jipproponi li jadħħal ‘breakfast club’, dik xi ħaġa li ilna li għamilnieha s-snin. Qed jipproponi li jdaħħal ‘childcare’ aktar affordabbli mhux b’xejn. Aħna mhux biss għamilnieha għas-snin din imma mhux aktar affordabbli għamilnieh imma b’xejn.”
Madanakollu, Dr Abela għamilha ċara li dan is-suċċess ma jiġix waħdu hekk kif huwa rrimarka li huwa kruċjali li l-Gvern li jkun jaf kif għandu jmexxi l-ekonomija tal-pajjiż.
Kien hawn li Dr Abela għamel referenza għal dak li l-Partit Nazzjonalista għamel meta kien fil-Gvern u li saħansitra għadu jitkellem dwaru illum il-ġurnata, b’mod speċjali fejn tidħol it-tmexxija ekonomika.
“L-agħar huwa illi f’dawn il-mumenti ikollok Partit Nazzjonalista li jibqa’ jħaddan l-istess politika ekonomika ta’ awsterità li kien iħaddan meta kien fil-Gvern. Iġifieri hawnhekk ir-realtà surreali ngħidilha jiena illi mill-Oppożizzjoni stess fejn il-Partit Nazzjonalista għandu l-lussu u wieħed għandu jifhem li l-Partit Nazzjonalista għandu jgħid li l-Gvern għandu jgħin iżjed lin-nies, li mill-Oppożizzjoni l-Partit Nazzjonalista jibqa’ jross fuq din il-politika ta’ awsterità.”
Il-Prim Ministru kien mistoqsi wkoll dwar ir-reazzjoni tiegħu għal pandemija li issa għaddew tliet snin mill-ewwel każijiet li kellna f’pajjiżna.
Fil-fatt Dr Abela tkellem dwar il-mod kif mexa l-Gvern b’kuntrast għall-Oppożizzjoni li ddeċidiet li tieħu pożizzjonijiet li kieku ġew attwati kienu jitfgħu l-pajjiż f’sitwazzjoni ta’ awsterità.
“Fosthom insemmi l-pożizzjoni tat-total lockdown, fosthom infakkar il-pożizzjoni l-Partit Nazzjonalista fuq il-vaċċin kieku llum dawk ir-riżultati pożittivi m’humiex qegħdin hemmhekk. Għalhekk dawn ir-riżultati huma frott ta’ sensiela ta’ deċiżjonijiet li ħadna anke mal-imsieħba soċjali fi ħdan l-MCESD u b’diskussjonijiet wiesgħa mal-poplu.”
Iżda Dr Abela innota kif din id-diskussjoni xprunata mill-fiduċja tal-Gvern fil-poplu Malti u Għawdxi wasslet biex tibqa’ tingħata l-għajnuna anki meta faqqgħet il-gwerra fil-Lvant tal-Ewropa.
Intant, il-Mexxej Laburista nnota kif pajjiżna għandu potenzjal enormi hekk kif dejjem wera reżiljenza quddiem l-isfidi li jkun affaċċjat bihom.
Dr Abela temm jgħid li b’hekk dan il-Gvern se jkun qiegħed joħroġ aktar b’saħħtu biex il-pajjiż jibqa’ miexi ‘l quddiem b’saħħtu.
