Hekk kif mat-tokki ta’ nofsillejl nhar l-1 ta’ Jannar 2017 iċċelebrajna t-tnedija tal-Presidenza Maltija tal-Kunsill tal-Unjoni Ewropea 2017, wasal iż-żmien ukoll sabiex inħarsu lura lejn dak li ġara matul dawn is-sitt xhur: il-Presidenza li tant kienet ilha mistennija, illum waslet fi tmiemha. Pajjiżna kien responsabbli għall-organizzazzjoni ta’ bosta avvenimenti bejn Jannar u Ġunju ta’ din is-sena, kemm f’pajjiżna kif ukoll lil hinn minn xtutna. Dawn l-avvenimenti kienu maqsuma f’dawk politiċi u dawk kulturali.
Huwa tassew xieraq li f’mument bħal dan inħarsu lura lejn uħud mill-aqwa kisbiet li saru f’dawn l-aħħar sitt xhur, li fihom pajjiżna kien għaddej minn ħidma siewja u ħabrieka bl-għan li dejjem inkomplu ntejbu l-Unjoni Ewropea. Uħud mill-aktar kisbiet popolari li saru waqt din il-Presidenza kienu abbinati ma’ dak li għandu x’jaqsam mad-dinja diġitali. Eliminajna t-tariffi tar-roaming: dan ifisser li ċittadini tal-UE li jivvjaġġaw għal Stati Membri oħra, iħallsu l-istess tariffi bħallikieku qegħdin lura f ’pajjiżhom, kemm fejn jidħol it-3G u l-4G, kif ukoll telefonati u SMSs.
Dan għandu jgħin liċ-ċittadini tal-UE li jkunu qegħdin jivvjaġġaw biex ikunu jistgħu jikkomunikaw b’mod aktar faċli ma’ dawk lura d-dar, kif ukoll jagħti għajnuna lil dawk li jixtiequ jikkomunikaw ma’ membri tal-familja u ħbieb li jgħixu fi Stati Membri oħra. Permezz ta’ din il-kisba se jgawdu wkoll in-negozji, minħabba tariffi baxxi fuq mezzi ta’ komunikazzjoni b’mod diġitali. Din il-kisba għandha tagħti mbuttatura kbira ’l fuq lis-settur tat-turiżmu. Kisba oħra fis-settur diġitali hija dik tal-portabbiltà, li toħloq opportunità għal min ikun imsiefer għal xi btala fi Stat Membru ieħor sabiex ikun jista’ jkollu aċċess għal kontenut li ssoltu jkun jista’ jara jew jisma’ minn pajjiżu.
Din il-konvenjenza se tgħin liċ-ċittadini tal-UE biex ikollhom aċċess ugwali ikunu fejn ikunu, u se tiffaċilita wkoll l-użu ta’ teknoloġija bħal smartphones, tablets u laptops meta ċittadin Ewropew ikun imsiefer. Il-Presidenza Maltija tal-UE ħadmet ukoll favur id-drittijiet tal-konsumatur fejn jidħol xiri u ħlas ta’ kontenut diġitali. Huwa mistenni li din il-kisba tgħin ħafna lill-kummerċ lil jsir onlajn. Sar ukoll progress fuq il-kunċett ta’ Wifi4EU, li jinkludi l-għan ta’ bejn 6000 u 8000 WiFi hotspot f ’postijiet pubbliċi bħal sptarijiet, pjazez u libreriji f ’kull belt u raħal fl-UE sas-sena 2020, li għandu jkun aċċessibbli kemm għar-residenti kif ukoll għat-turisti.
It-tagħmir neċessarju kif ukoll spejjeż tat-twaħħil se jiġu koperti minn fondi Ewropej, filwaqt li istituzzjonijiet pubbliċi se jħallsu ammont fix-xahar u se jkunu responsabbli sabiex dan it-tagħmir ikun miżmum kif xieraq. Il-Presidenza Maltija tal-Kunsill tal-UE assenjat mill-ġdid il-banda tal-frekwenza għolja ta’ 700MHz, li twitti t-triq għall-5G. Din it-teknoloġija tiżgura aċċess aħjar u internet iżjed b’saħħtu, li għandu jkun ta’ benefiċċju kemm għan-negozji kif ukoll għall-individwi li jgħixu fl-UE. Il-konnessjoni għandha tissaħħah ukoll f ’in- ħawi rurali, u permezz tal-5G, jistgħu jiġu introdotti servizzi diġitali innovattivi fl-oqsma tal-mediċina, tat-trasport u AI, filwaqt li jingħataw imbuttatura s-servizzi finanzjarji u s-settur tal-igaming.
Matul dawn l-aħħar sitt xhur sar ukoll ħafna xogħol fl-ekonomija. Fost il-ħidma li saret, insibu li sar ħafna progress fil-ġlieda kontra l-evażjoni tat-taxxa. Minħabba li ġew imsaħħa r-regoli f ’dan ir-rigward, in-negozji fl-UE issa se jkunu qegħdin iħallsu u jitħallsu b’mod xieraq fil-qasam taxtaxxa. Dan għandu jgħin ukoll ir-relazzjoni ta’ bejn in-negozji u l-konsumatur. Sar ukoll progress dwar problemi ta’ intaxxar doppju ġewwa l-UE. Dan l-iżvilupp għandu jtejjeb sewwa negozju li jsir bejn pajjiżi differenti. L-Unjoni Ewropea tirsisti ħafna għall-ekonomija tagħha, speċjalment fejn jidħol it-tkabbir ta’ negozi żgħar u medji. Għalhekk, infetħu s-sistemi ta’ fondi EUVECA u EUSEF, li jagħtu għajnuna finanzjarja lil dawn in-negozji filwaqt li jillimitaw ħafna l-burokrazija.
Matul din il-Presidenza saru bosta riformi f ’dawn iż-żewġ skemi u ’l fuq minn 499 impjegat se jsir eliġibbli għal fondi mill-EUVECA. Saret ukoll ħidma għal investimenti ta’ riskju baxx li se jkunu stabbli u ta’ kwalità għolja, u twaqqfu regoli ġodda sabiex in-negozji jkollhom aċċess għal finanzjament alternattiv mingħajr ħafna ostakli. Waħda mill-prijoritajiet li kellha l-Presidenza Maltija tal-Kunsill tal-UE 2017 kienet il-kwistjoni tal-migrazzjoni. Fit-3 ta’ Frar 2017, Malta organizzat Summit, fejn it-28 kap tal-Istati Membri tal-UE iltaqgħu fil-Palazz tal-Gran Mastru.
Dakinhar sar ħafna xogħol sabiex tonqos il-migrazzjoni irregolari u jitwaqqaf it-traffikar tal-bnedmin, li hu tant perikoluż għal dawk li jaqsmu l-ibħra għall-kenn. Sar ukoll progress li jibni fuq ix-xogħol tal-Valletta Summit li sar fl- 2015, u li juri biċ-ċar li l-UE hija kommessa sabiex jitwettaq dak li ġie miftiehem fil-Joint Valletta Action Plan. Il-kunsill tal-UE rnexxielu wkoll iżid il-finanzjament tal-Bank Ewropew għall-Investiment għal proġetti li jindirizzaw il-kwistjoni tal-migrazzjoni barra mill-UE. Dawn il-fondi jammontaw għal €3.7 biljun.
Ħdimna wkoll bis-sħiħ għas-sigurtà malfruntieri tagħna, kemm dawk bejn Stat Membru u ieħor, kif ukoll dawk li jagħtu għal pajjiżi oħra. Ix-xogħol li sar jiżgura li jkun hemm iżjed sigurtà fejn tidħol verifikazzjoni ta’ dokumenti. B’hekk, il-frodi fid-dokumenti tal-ivvjaġġar għandu jonqos drastikament. Ingħatajna wkoll il-mandat biex niddiskutu sistema ta’ dħul u ħrug mill-UE. F’dan is-settur sar prograss fuq ETIAS, sistema li taċċerta li jiġu ċċekkjati sew nies li m’għandhomx bżonn viża qabel jidħlu fiż-żona Schengen. Il-Kunsill tal-UE adotta direttiva dwar kontroll aħjar fuq l-akkwist u l-pussess ta’ armi tan-nar, bl-għan li ntejbu s-sigurtà pubblika u li nwaqqfu l-aċċess għal iżjed armi perikolużi.
Adottajna wkoll direttiva li għandha tgħin biex jittejbu l-għodda li għandhom l-Istati Membri sabiex jiġġieldu t-terroriżmu, u lħaqna wkoll konklużjonijiet dwar is-sigurtà u d-difiża fil-kuntest tal-Istrateġija Globali tal-UE għal ġestjoni aħjar fi stati ta’ kriżi. Bejn Jannar u Ġunju tal-2017 sar ħafna xogħol favur ambjent aħjar u enerġija iżjed nadifa. Sar ħafna progress fuq il-kwistjoni tal-emissjonijiet, fejn l-UE uriet li hi kommessa sabiex l-effiċjenza fl-enerġija tilħaq iċ-ċifra ta’ 40% sal-2030. Ix-xogħol li sar jobbliga lill-industrija sabiex tiżviluppa teknoloġiji iżjed effiċjenti filwaqt li tillimita wkoll it-tniġġis tal-arja. Parti minn dan il-progress kien abbinat ma’ tikkettar aħjar tal-apparat domestiku, skont l-effiċjenza u l-konsum tiegħu.
Il-Presidenza Maltija tal-UE ħadmet bis-sħiħ sabiex tiġi żgurata l-provvista tal-gass, kif ukoll sabiex tiġi stabbilita sistema ta’ informazzjoni soda bejn l-UE u pajjiżi terzi fir-rigward ta’ kuntratti tal-enerġija. Hekk għandha titjieb it-trasparenza u l-konsistenza tar-relazzjoni li l-UE għandha f ’dan il-qasam. F’dan iż-żmien intlaħaq ukoll ftehim fejn l-appoġġ u s-solidarjetà tal-UE għandha tiżdied għal reġjuni li jiġu affettwati minn diżastri naturali. Ħdimna għall-baħar ta’ madwarna. Permezz tal-Inizjattiva dwar il-baċir tal-Mediterran tal-Punent, huwa mistenni li titjieb il-governanza u s-sostenibbiltà tal-ekonomija marittima. Sar ukoll xogħol li għandu jipproteġi varjetà ta’ speċi, kif ukoll sajjieda u l-bastimenti tagħhom, fil-Baħar tat-Tramuntana. L-aħħar iżda mhux l-inqas insibu qasam li tant hu għal qalb pajjiżna: il-qasam tal-inklużjoni soċjali u s-saħħa. F’dan il-qasam saret ħidma bla qies favur edukazzjoni ta’ kwalità għolja għal kulħadd, bi skop li ninvolvu ż-żgħażagħ tal-Ewropa fi proġetti li jagħtu għajnuna lil bosta komunitajiet.
Sar ukoll ħafna xogħol li jsaħħaħ il-liġijiet li jipproteġu lill-konsumatur u ġie revedut il-Qafas Finanzjaru Pluriennali għall-2014-2020, bi ħsieb li jiżdied ix-xogħol. Il-Presidenza Maltija għamlet progress fil-qasam tas-saħħa, fejn ħdimna sabiex intejbu s-sigurtà tat-tagħmir mediku u l-aċċess għal dan it-tagħmir. Ħdimna wkoll sabiex l-UE tkun tista’ tipproteġi liċ-ċittadini tagħha minn alternattivi legali għal sustanzi li jagħmlu ħsara. L-UE ingħaqdet mal-Konvenzjoni ta’ Istanbul bl-għan li nipprevjenu u niġġieldu l-vjolenza kontra n-nisa u vjolenza domestika ta’ tipi oħra. Sar ukoll ħafna xogħol bl-iskop li neliminaw il-faqar permezz ta’ governanza aħjar, żvilupp ekonomiku u uman, u l-protezzjoni tar-riżorsi naturali tagħna. Illum beda Lulju u l-Presidenza għaddiet; kienu sitt xhur ta’ ħidma u bżulija liema bħalha, li ssarrfet f ’dawn il-kisbiet u oħrajn bħalhom, u li minnhom se ngawdu lkoll bħala ċittadini Ewropej, li niffurmaw parti minn din il-komunità soda u b’saħħitha.
Dawn is-sitt xhur bħal taru; bdejna b’ħafna entużjażmu, u dik l-enerġija baqgħet tidher sal-aħħar, tant li għandna bosta evidenza f ’dawn il-kisbiet kbar. Nagħmlu sew jekk nikkonkludu bi kliem il-President tal-Kunsill tal-Unjoni Ewropea nnifsu Donald Tusk, li qal li kien impressjonat bil-Presidenza Maltija u li sar xogħol eċċellenti f ’dawn l-aħħar sitt xhur. Tusk qal ukoll li Malta ħaqqha kull tifħir dwar din il-Presidenza ta’ suċċess.
