Fi stqarrija l-Partit Laburista qal li l-MEP tal-Partit Nazzjonalista fi Brussell u l-ex Ministru tal-Ambjent tal-Partit Nazzjonalista, li f’erba’ snin lanqas ressqu proposta waħda edukattiva, qed iduru fuq il-manifest elettorali tal-Partit Laburista fuq l-edukazzjoni li fih 86 proposta u li kważi twettqu kollha u diġa żdiedu magħhom.
Il-PL qal li ma’ dawn, il-Gvern mar oltre’ l-wegħdiet elettorali fl-edukazzjoni fosthom r-revision classes, stipendji, bini ta’ skejjel, boroż ta’ studju u ħafna ohrajn. Dan minkejja li f’kull statistika li qed tinġabar, mill-early school leaving rate u tal-litterizmu sa’ dawk internazzjonali (PISA, TIMSS u World Competitive Index) qed juru riżultati dejjem aħjar. Fil-qasam tal-għalliema ġie mwaqqaf working group biex is-sitwazzjoni tal-professjoni tal-għalliema tissaħħaħ.
L-istqarrija tgħid li l-Partit Nazzjonalista tant ma jafx x’qed jiġri fil-policies edukattivi, li mhux konsapevoli ta’ fatti ċari: li kull għalliem fi skola jaf li l-Ministru Bartolo ta’ kull sena jistieden lil kull għalliem f’kull kulleġġ tal-istat għal- laqgħa miegħu biex jiġu diskussi temi edukattivi. Dan ma jsirx bil-midja u mingħajr daqq ta’ trombi biex ikun hemm diskussjoni verament ġenwina bejn kulħadd.
Il-Gvern Laburista huwa kburi bis-success tat-tfal, edukaturi u żgħażagħ Maltin f’dan is-settur, sostna l-PL.
Il-PL semma kif mis-sena 2013 ‘l hawn bnew l-Iskola Nazzjonali tal-Isport f’Pembroke, l-iskejjel medji ġodda fin-Naxxar, Rabat, Bormla, Birkirkara u Ħal Kirkop. Din is-sena biss taw ħajja ġdida lill-facilitajiet fl-iskejjel primarji f’Għawdex u Malta fosthom ix-Xewkija, ix-Xagħra, il-Mellieħa, San Pawl il-Baħar u l-Għarghur. Dan minbarra programmi kbar ta’ xogħlijiet infrastrutturali fi skejjel madwar Malta u Għawdex. Sal-aħħar tal-leġislatura se jkunu nfetħu iktar skejjel ġodda. Dan ħafna iktar mill-wegħda tal-PN ta’ skola waħda biss fis-sena, qal il-PL.
Il-Partit Laburista semma kif ġew mnedija sensiela ta’ programmi vokazzjonali. Mill-Alternative Learning Programme twieldu programmi oħrajn simili u iffukati għal sfidi differenti: Il-Youth.Inc, ic-CCP, l-Prince’s Trust u in-Neets Activation fost l-oħrajn. Dan apparti is-suġġetti vokazzjonali f’livell sekondarju biex imbgħad dawn l-istudenti, li jlaħħqu l-mijiet, jistgħu jagħmlu O’levels f’kuntest vokazzjonali, infetaħ ċentru ta’ żvilupp tal-ħiliet għall-edukaturi f’Pembroke, kien hemm investiment ta’ ‘l fuq minn 40 miljun fit-teknoloġija fl-iskejjel u l-apparat tal-għalliema, inkluż laptops ġodda kif ukoll l-introduzzjoni tat-tablets fir-raba’ sena tal-iskejjel primarji.
Ma’ dawn ġew investiti miljuni f’xiri ta’ kotba ġodda fl-iskejjel biex illum hemm l-ikbar numru ta’ kotba ġodda fil-libreriji, kien hemm investiment biex għalliema jkunu jistgħu jingħataw sabbatical biex isaħħu l-ħiliet tagħhom, filwaqt li poġġejna l-edukazzjoni bħala waħda mill-prijoritajiet ewlenin fl-għoti tal-boroz ta’ studju.
Dan il-Gvern investa f’numru rekord ta’ boroz ta’ studju għaż-żgħażagħ Maltin u Għawdxin, saħħew l-proċess edukattiv bl-introduzzjoni tal-Learning Outcomes Framework kif ukoll tisħiħ ta’ suġġetti bħal accounts u xjenzi kif ukoll programm ġdid kif jiġu mgħallma l-lingwi, żiedu l-istipendji għall-istudenti u wessajna l-istipendju għal iktar nies – minkejja li Simon Busuttil qabel l-elezzjoni qal li se jitneħħew – filwaqt li studenti universitarji raw sensiela ta’ proġetti ġodda għax dan il-Gvern mhux talli ma ħalliex l-Universita bla flus, kif għamel Simon Busuttil, iżda talli investa l-miljuni. Magħhom jingħaqdu proġetti u riformi kbar għall-istudenti fl-MCAST, ħolqu eluf ta’ opportunitajiet t’ apprentistat b’investiment mill-Gvern. Anke hawn l-istipendju ġie ntrodott għall-ewwel darba u kif ukoll ħejjew klassijiet ta’ reviżjoni b’xejn għal dawk l-istudenti li ma’ jgħaddux mill-eżamijiet tas-SEC
Ma’ dawn, il-Gvern Laburista wettaq ukoll għexieren ta’ inizjattivi oħra fl-edukazzjoni u għal ġid tal-edukaturi, u se jkompli jaħdem biex l-edukazzjoni tat-tfal tagħna titjieb. L-għalliema jafu li fil-Ministru Evarist Bartolo għandhom ex-għalliem li jaf xi tfisser il-valuri u l-isfidi edukattivi tal-lum u ta’ għada.
L-istqarrija tgħid li l-Partit Nazzjonalista fl-FTS ħalla dizastru totali b’dejn ta’ €60miljun u miljuni oħra f’kontijiet mhux mħallsin. Ħalla wkoll lil dan il-Gvern inaddaf u jsib is-soluzzjonijiet għal dan it-taħwid li ġej minn qabel Marzu 2013. Il-Partit Nazzjonalista fl-edukazzjoni huwa ineżistenti u bla kredenzjali u jrid jkun tilef kull sens ta’ ironija jekk minn Brussell jgħid lil dan il-Gvern biex jkun iktar viċin l-edukaturi Maltin u Għawdxin.
