Ftit tal-ħin ilu seħħet il-purċissjoni tal-kardinali mill-Kappella Pawlina sal-Kappella Sistina, magħrufa mad-dinja kollha, fejn se ssir l-elezzjoni għall-Papa li jmiss. Din il-proċedura ilha ssir sa mis-Seklu 15.
L-aħħar konklavi, li sar fl-2013, eleġġa lill-Papa Franġisku wara biss ħames votazzjonijiet, biex b’hekk kienet waħda mill-aktar deċiżjonijiet veloċi fl-aħħar żminijiet għal dan il-proċess papali.
Fis-sekli bikrin, nuqqas ta’ ftehim kien iwassal biex il-konklavi jdum ġimgħat sħaħ u saħansitra xhur.
Wara li ssir il-votazzjoni, il-fidili miġbura fi Pjazza San Pietru – kif ukoll dawk madwar id-dinja kollha li jsegwu b’mod dirett – jibqgħu jistennew dak il-mument sinifikanti, jiġifieri d-duħħan li joħroġ miċ-ċumnija tal-Kappella Sistina.
Duħħan iswed ifisser li ma ntlaħaqx il-qbil meħtieġ u trid issir votazzjoni oħra, f’dan il-każ ikun għada filgħodu, filwaqt li duħħan abjad ifisser li jkollna Papa ġdid.
