Il-Prim Ministru Robert Abela qal li huwa żball li Adrian Delia abdika milli jiġi kkonsultat fl-għażla tar-regolatur tal-programm għaċ-Ċittadinanza b’Investiment.
Il-Prim Ministru qal dan fl-isfond ta’ tweet mill-Kap tal-Oppożizzjoni fejn iddikjara li ma jridx jibqa’ jiġi kkonsultat fl-għażla tar-regolatur.
Il-Prim Ministru qal li dan huwa żball min-naħa ta’ Adrian Delia hekk kif waħda mill-funzjonijiet kruċjali ta’ Kap tal-Oppożizzjoni hija li jressaq l-opinjonijiet tiegħu fuq affarijiet u kwistjonijiet importanti.
“Naħseb illi tabbdika minn din il-kariga minn din il-parti tant importanti tal-funzjonijiet ta’ Kap ta’ Oppożizzjoni kien żball minn naħa tiegħu.”
Minkejja d-dikjarazzjoni ta’ Delia, il-Prim Ministru Abela saħaq li lest jitkellem mal-Kap tal-Oppożizzjoni dwar iktar ħatriet fil-futur sabiex frott din il-kollaborazzjoni, il-pajjiż jikseb riżultati aħjar.
“Jiena nixtieq niddjaloga mal-Kap tal-Oppożizzjoni. Nagħtih l-id ta’ ħbiberija. Lest li nitkellmu mhux biss dwar din il-ħatra imma dwar diversi affarijiet oħra li nemmen li għandu jkun hemm konsensus dwarhom fosthom dwar tibdiliet fil-kostituzzjoni tagħna, tibdiliet kif tinħatar il-ġudikatura u nemmen li jekk nikkolaboraw flimkien noħorġu b’riżultat li jkun ħafna aħjar. Li inti tgħid li mhux se tipparteċipa u li mhux se tagħti xi input f’deċiżjoni jew oħra naħseb huwa żball minn naħa tal-Kap tal-Oppożizzjoni.”
B’reazzjoni għad-dikjarazzjoni ta’ Adrian Delia, il-Partit Laburista qal li l-irresponsabbiltà tal-Kap tal-Oppożizzjoni ma tafx limitu.
Dan għax anke li kieku kellha tittieħed il-proposta tiegħu u l-programm ta’ Ċittadinanza b’Investiment jiżżarma għal kollox, il-pajjiż xorta għandu jkollu regolatur li jissokta bix-xogħol fuq l-applikazzjonijiet li diġa’ saru u li jevalwa wkoll ir-riżultati u l-metodu kif tħaddem il-programm sa issa.
Madankollu l-Partit Laburista qal li dwar dan Adrian Delia ma jinteressahx u l-unika interess għalih huwa li jagħlaq programm li minnu qed igawdi l-pajjiż.
Intant il-Kamra tal-Kummerċ fissret il-programm taċ-Ċittadinanza b’Investiment bħala wieħed ta’ ġid għal Malta
Il-President tal-Kamra tal-Kummerċ David Xuereb saħaq dan bla tlaqliq waqt il-programm Indepth ta’ The Malta Independent.
“L-iskema tal-IIP ġabet ħafna ġid lill-pajjiż.”
Xuereb ikkumenta wkoll dwar kif id-due diligence tal-programm Malti huwa wieħed mill-aqwa fid-dinja.
“Aħna nifhmu, il-Kamra tal-Kummerċ tifhem, li d-due d-dilegence li jsir huwa serju ħafna. Wieħed mill-iktar serji f’ħafna pajjiżi.”
Intant fi stqarrija l-Partit Laburista qal li l-irresponsabbiltá tal-Kap tal-Oppożizzjoni ma tafx limitu u meta ma pparteċipax fil-ħatra tar-regolatur tal-programm ta’ Ċittadinanza b’Investiment qiegħed jabdika mir-responsabbiltajiet tiegħu.
Dan għax anke li kieku kellha tittieħed il-proposta tiegħu u l-programm ta’ Ċittadinanza b’Investiment jiżżarma għal kollox,il-pajjiż xorta waħda għandu jkollu regolatur li jissokta bix-xogħol fuq l-applikazzjonijiet li diġa’ saru u li jevalwa wkoll ir-riżultati u l-metodu kif tħaddem il-programm sa issa.
Iżda, Adrian Delia dan ma jinteressahx. Jinteressah biss li jagħlaq programm li minnu qed igawdi l-pajjiż. Fl-aħħar sigħat lanqas il-Kamra tal-Kummerċ ma qablet miegħu li l-programm għandu jingħalaq darba għal dejjem u minflok qed tipproponi tibdil bil-għan li l-programm jibqa’ għaddej.
Huwa Adrian Delia biss li minflok huwa interessat biex jirranġa u jtejjeb l-affarijiet huwa interessat biss biex ikisser.
