‘Viva Malta’, waħda mill-aktar kanzunetti ikoniċi bl-ilsien tagħna u, bla dubju, waħda mill-aktar popolari għar-Re tar-Rock ‘n’ Roll Malti, Freddie Portelli, se tkun qed tintuża f’serje televiżiva fuq l-istazzjon nazzjonali Britanniku, il-BBC.
Fil-fatt jirriżulta li l-kantant popolari Malti għadu kemm iffirma mal-BBC biex il-kanzunetta tiegħu, b’kompożizzjoni u lirika tiegħu stess, tkun tista’ tintuża fis-sensiela rinomata mad-dinja kollha ‘Here We Go’.
Dwar din l-aħbar, ONE News kellem lil Freddie Portelli nnifsu. L-artist, li llum għandu 81 sena, spjegalna kif, minkejja li din id-diska ilha li ħarġet kważi sittin sena, dejjem tibqa’ tirrenja u kultant tfeġġ anke f’pajjiżi sew ’il bogħod minn artna.
“Irċevejt mingħand producer kbir jismu Sam Ward u għandu sensiela jisimha ‘Here We Go’, popolari mad-dinja. Qalli tista’ tagħtina permess nużaw ‘Viva Malta’. Issa bagħtuli l-kuntratt u ffirmajt u kollox. Dejjem b’xi ħaġa ta’ ‘Viva Malta’ u daqqa jgħiduli li ħarġet hemm u daqqa li ħarġet hemm. Issa l-aħħar li ħarġet l-Iran.”
Freddie Portelli
Hawn Portelli tana stampa ċara ta’ kif, fl-1966, kiteb din il-kanzunetta b’kumbinazzjoni, proprju fuq pakkett tas-sigaretti fil-Ġermanja, għax sħabu bdew jgħidulu li jekk ma jagħmel xejn se jaqgħu għaċ-ċajt mal-udjenza.
“Introduċejtha l-ewwel darba fil-Ġermanja fuq it-televixin, kien programm popolari tal-għaġeb, fis-66 u ħarġet fis-67 u, minflok inftiet, kompliet iżżid. U jdoqquha orkestri ta’ barra, eżempju r-Russja u anke l-Korea ta’ Fuq idoqquha. Kien hemm pakkett tas-sigaretti u bdejt nikteb hekk, beda ħiereġ ħafna kliem, tant kemm għajruni, beda ħiereġ kliem awtomatikament. Qbadt il-kitarra u kif tajthom l-ilħna u hekk qaluli għoġbitna ta.”
Freddie Portelli
Sadanittant Freddie Portelli qalilna kif, minkejja li għadda ħafna żmien minn fuqha, din il-kanzunetta għadha tindaqq b’mod regolari, ewlenin fosthom fl-akbar kunċert li jittella’ f’pajjiżna, dak tal-Isle of MTV.
“L-aħħar li ġew taw sorpriża lil kulħadd. Inzertaw it-tfal tiegħi kienu Malta u kienu hemm u kienu ħa jibku. Qaltli taf kif għamlu n-nies. Filli qed idoqqu diski moderni u mbagħad ħaduli leħni lili u għamlu l-backing huma u daqqew ‘Viva Malta’ wkoll.”
Freddie Portelli
