Il-Kamra tal-Periti irreaġixxiet għall-Avviż Legali dwar ir-regolariżżazzjoni ta’ żvilupp eżistenti. Qalet li f’Mejju li għadda kienet issottomettiet ir-reazzjonijiet formali għall-abbozz ta’ l-Avviż. Dak iż-żmien kienet qalet li l-abbozz kien jinkludi wisq rekwiżiti vagi.
Il-Kamra għarfet li l-Avviż Legali ġie preżentata mill-Awtorita’ ta’ l-Ippjanar lill-professjoni waqt laqgħa ta’ informazzjoni ftit ġimgħat ilu. Iżda esprimiet tħassib fuq numru ta’ punti, ewlenija fosthom li r-regolamenti mhux ċari u huma miftuħa għal interpretazzjoni wiesgħa.
Fi tweġiba għal din l-istqarrija, is-Segretarjat Parlamentari għall-Ippjanar u s-Simplifikazzjoni Amministrattiva spjega s-sitwazzjoni kif kienet qabel id-dħul tal-avviż, f’numru ta’ punti.
Permezz ta’ stqarrija qal li l-liġi hija maħsuba primarjament għal bosta sidien ‘in bona fede’ li xtraw proprjetà fil-passat u li skoprew li ma jistgħux ipoġġuha fis-suq għaliex tali proprjetà hi irregolari.
Il-liġi preċedenti kienet diġà tipprovdi għall-possibbiltà li wieħed iwaqqaf lill-Awtorità milli tieħu azzjoni fuq proprjetà illegali, u dan meta tali proprjetà kienet tinsab fiż-żona urbana u mibnija qabel is-sena 1993. Dan anke jekk l-illegalità kienet tammonta għal ‘tbajja indelibbli fl-ambjent urban’. L-Awtorità, f’każijiet bħal dawn, ma setgħet bl-ebda mod timponi kundizzjonijiet biex almenu dak li jkun itejjeb l-istat tal-bini illegali.
Il-Gvern preċedenti kien introduċa skema, magħrufa aħjar bħala CTB, permezz ta’ liema individwu seta’ jitlob lill-Awtorità tagħlaq għajnejha quddiem l-illegalità f’ċerti sitwazzjonijiet. Sfortunatament, sostna s-Segretarjat, bosta applikanti li ottjenew permess CTB fil-passat kien minn għalihom li kisbu permess f’idejhom, iżda fil-fatt konċessjoni ma tfissirx permess. Kien ifisser biss li l-Awtorità tagħlaq għajnejha quddiem illegalità.
Is-Segretarjat spjegaw ukoll il-viżjoni tiegħu. Il-gvern irid isolvi l-problema ta’ bosta proprjetarji li akkwistaw il-proprjetà ‘in bona fede’ u li ma jistgħux ibigħu din il-proprjetà minħabba irregolaritajiet li sabu ma’ wiċċhom snin wara. Irid jagħti ċertezza legali lil dawk l-eluf li ottjenew CTB taħt il-liġi preċedenti u li kien mingħalihom li akkwistaw permess, meta fil fatt dan ma kienx il-każ. Il-Gvern irid ukoll li l-Awtorità tkun tista’ taġixxi fuq l-illegalitajiet mibnija qabel is-sena 1993, u li taħt il-liġi preċedenti wieħed seta’ jitlob li ma jiġux infurzati minkejja li kienu ‘tbajja indelibbli fl- ambjent urban’. Il-gvern għamilha ċara sa mill-bidu li dan l-eżerċizzju għandu jkun eskluż għall-ODZ, u jrid li jsolvi problema li gvern preċedenti ma kellux il-kuraġġ jaffronta.
Biex iwettaq dan, il-Gvern għandu mandat elettorali biex iwettaq din il-miżura. Il-gvern uża s-setgħat mogħtija lilu permezz tal-liġi.
Il-leġiżlatur ried mill-bidu li din il-leġiżlazzjoni ma sservix bħala amnestija, bħal donnu ‘kollox jgħaddi’. Fil-fatt, l-Avviż Legali jagħti s-setgħa lill-Awtorità li timponi kwalunkwe kundizzjoni li tqis neċessarja, inkluż, iżda mhux biss, l-eżekuzzjoni ta’ xogħlijiet speċifiċi fi żmien stipulat li ma jkunx aktar minn sentejn’.
