Il-kampanja elettorali in-nies jagħmluha u hija tan-nies. Fil-fatt il-manifest elettorali tagħna għamluh in-nies.
Sostniet dan mart il-Prim Ministru Dr Lydia Abela waqt intervista fuq il-programm Espresso fejn enfasizzat l-importanza tal-kuntatt man-nies f’din il-kampanja elettorali.
Dan anke sabiex titwettaq politika tan-nies u għan-nies.
Qalet, “Dan l-eżerciżżju sewa ħafna, sewa ħafna biex tnibbtu dawk il-mitt idea li mbagħad ġew ikkonvertiti fl-elf proposta li hemm fil-manifest li huma indirizzati biex jolqtu dak li qalulna n-nies. Pereżempju ħafna nies kienu jgħidulna isma aħna orrajt għandna x-x-xogħol, għandna l-flus fil-but imma aħna rridu kwalità ta’ ħajja aħjar għaliex inti mhux billi jkollok il-flus fil-but. Il-flus fil-but inti trid tgawdihom. Allura kien hemm min pereżempju f’Malta hawn nieqsa spazji ħodor.”
Fuq ONE, Dr Abela tenniet li dan il-messaġġ xpruna l-proposta ewlenija tal-Partit Laburista, dik ta’ €700 miljun favur aktar spazji miftuħa u ġonna pubbliċi fil-qalba tal-irħula Maltin f’Malta u Għawdex.
Tul l-intervista, Dr Abela rrimarkat ukoll proposti li poġġa ’l quddiem il-Partit Laburista fosthom dawk li jolqtu t-tfal u l-għajnuna sabiex ikomplu bil-vjaġġ edukattiv tagħhom.
Hekk kif tul l-intervista bdiet tingħata ħarsa lejn din il-kampanja elettorali, Dr Abela tenniet kif il-messaġġ tal-Partit Laburista dak ta’ Malta Flimkien, huwa messaġġ favur l-għaqda bejn kulħadd.
Dan speċjalment fi żmien fejn pajjiżna affaċċja diversi sfidi u affaċċjahom b’rasu mgħollija.
Qalet, “Importanti li nhar is-Sibt immorru nivvutaw, ejjew niftakru fil-kisbiet li għamilna u ħarsu lejn il-futur. Futur li se jkun sabiħ, bi proposti li ressaqna bħala Partit. Kunu magħna, nhar is-Sibt morru vvutaw, morru ivvutaw kmieni u vvutaw lill-kandidati kollha tal-Partit Laburista.”
