| Il-Federazzjoni Kaċċaturi Nassaba Konservazzjonisti (FKNK) tikkundanna bil-qawwa kollha l-aħħar kampanja ta’ BirdLife Malta biex teqred lin-nassaba Maltin u Għawdxin, “#CitizensAGAINSTtrapping”, u tiddeskriviha bħala qarrieqa, provokattiva u attentat biex timmina t-tradizzjonijiet u l-liġijiet soċjo-kulturali Maltin. Il-kampanja li tappella liċ-ċittadini biex jieħdu azzjoni kontra n-nassaba tal-għasafar tal-għana mhix biss attakk fuq il-prattika nnifisha, iżda wkoll sfida diretta għall-Gvern Malti u l-appoġġ tal-FKNK għall “Finch Research Programme”. Il-gvern Malti aktarx kien jistenna aktar gratitudni għall-mijiet ta’ eluf ta’ ewro mit-taxxi li jħalsu l- Maltin li jagħti lill-BirdLife kull sena, filwaqt li l-FKNK, li l-membri tagħha jħallsu mijiet ta’ eluf ta’ ewro f’taxxi kull sena għal-liċenzji tal-kaċċa u l-insib u spejjeż u xiri mixxellanji relatati, ma tistenna xejn aħjar mill-abolizzjonisti tat-tradizzjonijiet soċjo-kulturali lokali. Ta’ min jgħid ukoll li l-kampanja hija mmirata lejn ċittadini Maltin u mhux neċessarjament Maltin, hekk kif il-BirdLife qed tingaġġa u possibilment tiffinanzja partitarji barranin li mhumiex familjari u insensittivi għall-wirt soċjo-kulturali tal-kaċċa u l-insib f’Malta. Barra minn hekk, il-FKNK tisfida apertament lil BirdLife Malta biex tipprovdi evidenza biex issostni l-allegazzjoni tagħha li s-sena l-oħra nqabdu aktar minn 51,400 għasfur tal-għana, ċifra spekulattiva aktar milli fatt. Barra minn hekk, il-FKNK tiddubita l-eżattezza tal-postijiet tal-imnasab fuq il-mappa tal-BirdLife, u ssostni li ħafna mill-koordinati pprovduti huma pplottjati b’mod ineżatt. Waħda mill-kwistjonijiet ewlenin ta’ tħassib hija l-legalita’ u s-sigurta’ tas-sejħa tal-BirdLife għall-intervent taċ-ċittadin. BirdLife qegħda tħeġġeġ liċ-ċittadini biex jirrappurtaw kull lemħa ta’ għasafar tal-għana tat-taħrik jew f’gabjetta f’mansab li jkun mingħajr ċurket magħluq u bla saldatura kif suppost. Madankollu, l-FKNK issostni li l-verifika tal-preżenza ta’ ċurkett fuq għasfur ħaj teħtieġ spezzjoni mill-qrib, fl-idejn, li l-pulizija u l-uffiċjali awtorizzati biss huma permessi li jagħmlu. L-ebda attivista ta’ BirdLife, CABS, MRU jew ċittadin ordinarju mhu awtorizzat b’dan il-mod. Għalhekk, iċ-ċittadini li jirrispettaw il-liġi għandhom jiġu mwissija li jekk jaġixxu mod ieħor dan jista’ jwassal għal illegalitajiet ta’ “trespassing”, “pretended rights” jew saħansitra fastidju lin-nassaba leġittimi. B’reazzjoni għall-kampanja tal-BirdLife, il-FKNK tħeġġeġ lin-nassaba biex jirrapportaw kull spezzjoni jew indħil mhux awtorizzat lill-pulizija fuq 119 f’Malta u 21562040 f’Għawdex. L-istess rapporti jistgħu jsiru wkoll lill-FKNK fuq 99474503. Fl-aħħar nett, l-FKNK tixtieq tenfasizza l-oppożizzjoni tagħha għal dik li tqis bħala kampanja invażiva, sensazzjonalista u miżrappreżentattiva minn BirdLife Malta, u temmen li tista’ tpoġġi liċ-ċittadini f’periklu legali taħt il-lenti tal-attiviżmu ambjentali. |
