F’dak magħruf bħala l-Accession Council, Karlu III b’mod uffiċjali ġie proklamat Re tar-Renju Unit.
Fil-Palazz ta’ San Ġakbu f’Londra, għal dan il-Kunsill storiku, attendew bosta kbarat, fosthom membri mill-familja Rjali, il-Prim Ministru Ingliż Liz Truss, eks Prim Ministru, politiċi, l-Arċisqof ta’ Canterbury u dak ta’ York.
Fl-ewwel parti tal-Kunsill, ġiet moqrija t-tħabbira tal-mewt tar-Reġina Eliżabbetta t-Tieni. Wara nqrat il-proklamazzjoni li biha, il-Prinċep Charles Philip Arthur George sar Karlu III.
Il-Proklamazzjoni ġiet imbagħad iffirmata minn membri tal-Accession Council, fosthom minn mart ir-Re, Camilla, mill-Prinċep William, mill-Prim Ministru Ingliż u oħrajn.
Il-President tal-Kunsill, Lord Penny Mordaunt ordnat sabiex il-proklamazzjoni tiġi moqrija f’Londra, Edinburgh, Cardiff u Belfast.
Fit-tieni parti, il-Kunsill mexa għas-Sala tat-Tronn, fejn hemmek huma laqgħu u semgħu d-diskors tar-Re l-ġdid.
Ir-Re Karlu III, ħabbar b’mod uffiċjali l-mewt ta’ ommu.
Hawnhekk ir-Re stqarr li huwa konxju tar-responsabilitajiet li ntirtu lilu bħala Kap tal-Monarkija Ingliża, filwaqt li qal kif tul ir-Renju tiegħu huwa se jimxi fuq l-eżempju ta’ ommu.
Eżatt wara, ir-Re propju ħa l-ħalfa dwar is-sigurtà tal-Knisja tal-Iskozja.
Waqt il-Kunsill tħabbar ukoll kif il-ġurnata tal-funeral tar-Reġina Eliżabbetta t-Tieni ġiet iddikjarata bħala btala pubblika fir-Renju Unit.
Għall-ħabta ta’ nofshinar neqsin kwart, ħin ingliż, intemm il-Kunsill.
Kien hawn li dak magħruf bħala l-Garter King of Arms ħareġ mill-gallerija tal-Palazz u qara l-proklama uffiċjali, bl-għajta ta’ God Save The King u d-daqq tal-fanfarra fl-isfond.
F’dan il-mument ukoll, it-truppi tar-Re sparaw wieħed u erbgħin tir f’Hyde Park u tnejn u sittin tir mit-Torri ta’ Londra.
It-tieni proklamazzjoni nqrat propju mat-tokki ta’ nofshinar fuq it-turġien tal-binja tar-Royal Exchange.
Għal dawn il-proklamazzjonijiet attendew eluf ta’ nies, li lkoll kantaw l-Innu Nazzjonali Brittaniku bit-tibdiliet il-ġodda fih.
Għada, jkomplu jinqraw aktar proklamazzjonijiet fl-Iskozja, f’Wales, u l-Irlanda ta’ Fuq.
Bnadar li bħalissa jinsabu meżżasta bħala sinjal ta’ rispett wara l-mewt tar-Reġina Eliżabetta, se jerġgħu jittellgħu lura fil-glorja tagħhom wara li jitlaqqa’ l-Accession Council.
Nhar il-Ħadd li ġej il-bnadar jerġgħu jinżlu u jittajru meżżasta.
Intant, fil-jum tas-Sibt, eluf ta’ nies poġġew fjuri, ritratti tar-Reġina Eliżabbetta t-Tieni u pitturi quddiem il-grada tal-Palazz Irjali f’Londra.
