Jubatus, il-jott ta’ Sean Borg, niżżel ismu fl-istorja tal-ibburdjar waqt l-International Yacht Paint Marzamemi Weekend meta kissru r-rekord tat-tellieqa minn Malta għal Marzamemi.
Ir-rekord il-ġdid issa huwa ta’ 5 sigħat, 48 minuta u 54 sekonda. Ir-rekord preċedenti kien stabbilit minn Strait Dealer fl-2009 u kien ta’ 6 sigħat 10 minuti 17-il sekonda.
Ir-Royal Malta Yacht Club reċentement laqa’ flotta b’saħħitha u varjata ta’ dgħajjes tat-tlielaq u cruising li telqu mill-Port ta’ Marsamxett għal korsa ta’ 60 mil nawtiku lejn Marzamemi. L-akbar jott ikun Barong D, Jott Wally ta’ 110 pied misjuq minn Andre Rossignaud, u bl-iżgħar jott ikun Pep, J92 ta’ Mark Camilleri.
L-Uffiċjal tat-Tlielaq Jonathan Sammut qasam il-flotta f’żewġ Klassijiet. L-IRC Racers u l-IRC Cruisers kienu l-ewwel li tellqu, bil-flotta tal-RMYC Cruisers isegwuhom ħames minuti wara.
It-tiġrija bdiet b’riħ ta’ forza 5 u nefħa moderata mill-majjistral iżda r-riħ beda jiżdied kif beda joqrob lejn Sqallija. Inizjalment il-veloċitajiet tar-riħ kienu jvarjaw minn 15-il mil nawtiku fis-siegħa iżda hekk kif l-ewwel dgħajjes bdew jaslu għal Capo Passero ir-riħ beda jolqot buffuri ta’ 30 mil nawtiku fis-siegħa.
“Filwaqt li l-bidu kien hemm kundizzjoni perfetti, l-aħħar siegħa qabel ma wasalna Capo Passerso ir-riħ kien qed jolqot buffuri qawwija li huma kundizzjonijiet perfetti għal Jubatus, madankollu l-aħħar parti lejn it-tmiem kienet iebsa u għamlitha diffiċli ħafna għall-ekwipaġġ biex jikkontrolla d-dgħajsa. Minkejja dan, ninsabu soddisfatti u kburin li ksibna rekord li kien ilu ma jinkiser għal tant snin, ” stqarr Sean Borg, skipper Jubatus.
Minkejja li ltaqgħu ma’ temp qawwi, il-kundizzjonijiet żguraw li l-flotta kollha waslet f’Marzamemi f’ħin tajjeb.
Anke jekk il-flotta kienet maqsuma fi klassijiet tat-tlielaq u tal-cruisers, iż-żewġ kategoriji ma kinux jonqsu minn element ta’ kompetizzjoni.
Notevolment, fil-Klassi Cruising RMYC, spikka Code Zero. Immexxi minn missier u iben Matthew u Seb Miceli Demajo. Ta’ 11-il sena biss Seb kien l-iżgħar parteċipant fit-tellieqa. Minkejja l-età żgħira tiegħu, Seb huwa baħri ta’ esperjenza tal-Klassi Optimist, li ser jirrappreżenta lil Malta fil-Kampjonati tad-Dinja Optimist li ġejjin, filwaqt li fl-istess ħin jissaħħaħ il-ħiliet tiegħu fit-tlielaq ta’ dan it-tip. Il-jott Code Zero ħadet li l-unuri tal-linja f’din il-klassi iżda ġew fit-tieni post wara korrezzjoni ta’ ħin, wara Lucy X ta’ Paul Ellul.
B’tbassir b’kundizzjonijiet ħfief għar-ritorn, il-previżjonijiet wrew li l-flotta kien ser jkollhom sfida biex jilħqu jaslu Malta fil-ħin stabillit. Minkejja li kienu l-eqreb
kontendenti biex itemmu t-tellieqa, Jubatus ma setgħux jegħlbu il-kundizzjonijiet u sfortunatament id-dgħajjes kollha kienu mġiegħla jirtiraw fl-aħħar.
Adrian Gauci Borda, Rear Commodore (Sailing) fir-Royal Malta Yacht Club, innota, “Minkejja li t-temp żamm lill-flotta milli tlesti t-tellieqa lura lejn Malta, il-parti tat-tellieqa lejn lejn Marzamemi żgur kkumpensat għaliha. Li wieħed jara lil Jubatus jistabbilixxi rekord ġdid kien tassew speċjali — prosit lill-ekwipaġġ.”
Matul il-waqfa ta’ tmiem il-ġimgħa f’Marzamemi, l-ekwipaġġi u l-ħbieb gawdew avveniment soċjali ġewwa agriturizmu tipiku Sqalli. Logħba ta’ ‘tug of ‘war’ bejn l-ekwipaġġi żiedet l-element divertenti tal-weekend.
LGħoti tal-Premjijiet saret waqt serata miżmuma fir-Royal Malta Yacht Club fil-preżenzż tal-Commodore tal-Club, David Cremona u Andrew Magri Overend, Group CEO MacMed Group, rappreżentanti tal-International Yacht Paints f’Malta.
“Hekk kif ikkonkludejna dan l-avveniment, nirriflettu fuq is-sħubija tagħna mar-Royal Malta Yacht Club, billi nikkonfermaw l-impenn tagħna għall-eċċellenza fil-kura tad-dgħajjes u l-ispirtu dejjiemi tal-ibburdjar, li jdur madwar l-element tal-ħbiberija, il-komunità, u l-imħabba kondiviża għall-baħar. Nestendew l-akbar gratitudni tagħna lill-Club u lill-parteċipanti kollha talli għamlu dan l-avveniment suċċess kbir.”
L-avveniment li jmiss se tkun il-Camilleri Marine Ragusa Weekend li hija skedata li ssir bejn is-7 u d-9 ta’ Ġunju.
International Yacht Paints Marzamemi Weekend Riżultati
IRC Class 1
L-ewwel – Jubatus (Sean Borg) – 1st Overall, 1st In Class, Race Record Holder
IRC 2
L-ewwel – Sail Away (Ray Schembri)
IRC Cruisers
L-ewwel – Kon Tiki (Ferdinand Grech)
It-Tieni – Dimm (Kevin Pisani Zammit)
RMYC Cruisers
L-ewwel – Lucy X (Paul Ellul)
It-Tieni – Code Zero (Matthew Miceli Demajo / Seb Miceli Demajo)
It-Tielet – Cloud Spotter (John De Giorgio)
