Il-ġurnal influwenti Politico qabbel il-manuvri li qed iżidu fl-intensità tagħhom biex iċ-Chief of Staff tal-President tal-Parlament Ewropew Roberta Metsola jingħata l-iktar kariga amministrattiva b’saħħitha fil-Parlament, dik ta’ Segretarju Ġenerali u kap taċ-ċivil tal-Parlament, ma’ karozza li bil-mod il-mod qed tinstaq lejn tarf l-irdum.
Il-ġurnal dalgħodu kiteb li t-tmexxija tal-Parlament qiegħda f’din il-karozza metaforika, u li l-ebda appell u akkużi ta’ nepotiżmu u korruzzjoni istituzzjonali li saru mill-membri parlamentari Ewropej, mill-organizzazzjonijiet mhux governattivi li jimmilitaw favur it-trasparenza, u mir-rappreżentanti tal-impjegati tal-Parlament ma rnexxilhom iwassluhom biex jagħfsu l-brejkijiet.
Il-Politico qal li nies li jaħdmu mill-qrib ma’ Roberta Metsola fit-tmexxija tal-Paarlament Ewropew qalulu li, għall-kuntrarju, akbar ma kienet l-oppożizzjoni, aktar Metsola saret determinata biex turi lil kulħadd li l-karozza qed issuqha hi.
Il-Burea tal-Parlament Ewropew, li hu magħmul minn Metsola, mill-14-il viċi tagħha, u minn ħames membri oħrajn, mistenni jiltaqa’ llum biex jaħtar liċ-Chief of Staff ta’ Metsola, it-Taljan Alessandro Chiocchetti, fl-aktar kariga amministrattiva mħallsa tajjeb f’din l-istuzzjoni Ewropea.
Il-ġurnal internazzjonali rrapporta li Metsola qed timbotta ’l quddiem il-ħatra ta’ Chiocchetti mingħajr il-ħsieb li tintervista lill-kandidati l-oħrajn li applikaw u ġew preselezzjonati. Minflok, kull wieħed mill-erba’ applikanti se jingħata ftit minuti biex jagħmel preżentazzjoni dwar għaliex huwa idoneu għal din il-kariga, u wara l-Bureau jivvota bla ma jagħti l-opportunità lill-applikanti biex jagħmlu xi mistoqsijiet.
Filwaqt li kkummenta li l-ħuta minn rasha tinten, il-Politico jirrapporta li membri tal-Bureau tal-Parlament Ewropew ġibdulu l-attenzjoni għall-fatt li kwalunkwe membru ieħor taċ-ċivil tal-Parlament biex jintgħażel irid jgħaddi minn proċess ikkumplikat ta’ intervisti. Għall-kuntrarju, il-kap taċ-ċivil tal-Parlament Ewropew se jinħatar sempliċiment bi ftehim li sar minn wara dahar kulħadd.
Il-Politico rrapporta li, fil-jiem li għaddew, kien hemm ferneżija ta’ telefonati u laqgħat bejn membri tal-Bureau, mexxejja politiċi, u deputati parlamentari Ewropej biex jaraw ikunx jabel li l-vot tal-lum jiġi pospost biex għall-inqas jippermetti li jsir proċess ta’ intervisti kif suppost. Madankollu, nies involuti fil-Bureau qalu li sal-bieraħ filgħaxija, Metsola kienet għadha qed twebbes rasha.
Fil-frattemp, mill-Grupp tal-Partit Popolari Ewropew – il-grupp politiku Ewropew li jagħmu parti minnu Metsola u l-Partit Nazzjonalista – saret pressjoni fuq it-tliet kandidati l-oħrajn biex jitilqu mit-tiġrija sabiex il-ħatra taċ-Chief of Staff ta’ Metsola, Alessandro Chiocchetti, tkun tista’ ssir b’inqas intoppi.
Intant, fi tmiem il-ġimgħa, il-moviment globali kontra l-korruzzjoni Transparency International bagħat ittra iebsa lil Metsola u lill-Bureau li fiha ħeġġiġhom jabbandunaw dak li rrefera għalih bħala ftehim oxxen li sar wara bibien magħluqin u jagħtu bidu għal proċess verament trasparenti għall-ħatra tas-Segretarju Ġenerali l-ġdid tal-Parlament Ewropew. It-Transparency International fakkar li l-Parlament Ewropew huwa l-uniku mill-istituzzjonijiet tal-Unjoni Ewropew li rrifjuta li jieħu sehem fi studju li qed tagħmel l-istess Transparency International dwar is-sistemi tal-integrità u l-etika fis-sistemi kif isiru r-reklutaġġi.
Intant, kelliem għal Roberta Metsola lbieraħ filgħaxija qal li, f’kull stadju tal-proċess tal-għażla ta’ Segretarju Ġenerali tal-Parlament Ewropew, il-President Metsola żgurat li dan isir kif xieraq, b’mod miftuħ, u li joffri l-ispazju biex kull min ried ressaq ismu filwaqt li ppermetta li jinstemgħu l-vuċijiet kollha.
