F’Dar Malta, fi Brussell, qed jirrenja entużjażmu sħiħ fid-dawl li l-Presidenza Maltija telqet fuq sieq tajba ħafna. Kien hemm laqgħat importanti fi Brussell u oħrajn f’pajjiżna filwaqt li f’dan l-ewwel xahar ingħalqu ftehimiet importanti bħal dak tar-Roaming. Dan il-proċess li involva ħafna tħejjija u diskussjonijiet kien dak li wasal fi tmiemu nhar it-Tlieta li għadda fejn il-Ministri Maltin ressqu l-prijoritajiet tagħhom quddiem il-kumitati differenti tal-Parlament Ewropew.
KullĦadd tkellmet dwar dan il-proċess u iktar ma’ Cyrus Engerer, mibgħut tal-Prim Ministru fi Brussell u responsabbli għar-relazzjonijiet tal-Gvern Malti mal-Parlament Ewropew.
Il-Presidenza ilha għaddejja ftit iktar minn erba’ ġimgħat. Int li għaddej bil-ħidma fi Brussell tista’ ssemmili xi ħaġa li sibt kif stennejt?
Bla dubju, l-iktar ħaġa li kienet kif konna qegħdin nistennew hu l-volum ta’ xogħol li ġġib magħha l-Presidenza. Filwaqt li tkun ilek tipprepara għall-mument, fil-każ tagħna għal ftit iktar minn sentejn, fl-aħħar ġimgħat qabel il-Presidenza u waqt il-Presidenza nnifisha tirrealizza li l-ħajja privata tiegħek ma jibqax ħin għaliha. Kull minuta tal-ġurnata, bi tmiem il-ġimgħa inkluż, taf li jkun għad baqagħlek iktar x’tagħmel u iktar nies ma’ min trid titkellem.
Kien hemm xi ħaġa li ħaditek b’sorpriża?
Min-naħa l-oħra, l-iktar ħaġa li ħaditni b’sorpriża kienet l-ammont kbir ta’ nies li jkunu jixtiequ jiltaqgħu miegħek.. Filwaqt li fil-preparamenti tkun taf li se tiġbed interess kbir u li se tkun fiċ-ċentru tal-attenzjoni, fuq livell Ewropew, għal sitt xhur, meta attwalment jibdew deħlin talbiet għal laqgħat ma’ rappreżentanti minn kull pajjiż madwar id-dinja, rappreżentanti fi Brussell, delegazzjonijiet mill-istituzzjonijiet Ewropej, Stati Membri, NGOs, kumpaniji u ġurnalisti, teħodha b’sorpriża kif dawn kollha jkun irnexxielhom jakkwistaw l-indirizz tal-imejl tiegħek u n-numru tal-mowbajl.
Irrakkontali mument li tak sodisfazzjon iktar minn oħrajn.
Għalija l-iktar mument ta’ sodisfazzjon s’issa kien meta l-Prim Ministru Joseph Muscat, kif ukoll il-Ministri kollha, marru fil-Parlament Ewropew (kemm fil-Plenarja u l-Kumitati kollha) jippreżentaw il-programm ta’ ħidma tal-Presidenza Maltija u jiġu mistoqsija mill-Membri tal-Parlament Ewropew mistoqsijiet xi kultant iebsin dwar dak li beħsiebna nagħmlu fis-sitt xhur tagħna fit-tmun tal-Kunsill u tara s-sodisfazzjon fuq wiċċhom għar-risposti li l-Prim Ministru u l-Ministri Maltin ikunu tawhom.
Dak il-mument tifhem li x-xogħol kollu li tkun għamilt flimkien mat-tim li tkun qiegħed tmexxi jkun ħalla r-riżultati mixtieqa u allura tkun ċert li tkun studjajt sew is-sitwazzjoni u tkun għamilt ix-xogħol meħtieġ biex tagħmel suċċess.
Kif qed tħejju għal jum tax-xogħol? Jew ma nbidel xejn?
It-tħejjija għall-jum tax-xogħol inbidlet ħafna. Tista’ tgħid li issa t-tħejjija ma tispiċċa qatt għaliex il-ħin kollu għandek numru kbir ta’ affarijiet li tkun qed tħejji għalihom b’mod simultanju. Li hu żgur li l-iżveljarin idoqq bosta sigħat iktar kmieni mis-soltu u tidħol torqod ħafna iktar tard minn dak li tkun imdorri għalih.
Fl-aħħar mill-aħħar però, dak kollu li tkun qiegħed tagħmel, żgur ma jkunx possibbli mingħajr it-tim tiegħek ta’ kollegi li taf li bħalek mhux qegħdin jieqfu jaħdmu, bi kburija, biex jaraw li l-ewwel Presidenza Maltija tal-Kunsill tal-Unjoni Ewropea tkun suċċess.
X’qalu Brussell fuq l-identità viżwali tal-Presidenza Maltija?
Kien hemm kurżità kbira għall-identità viżwali tal-Presidenza u għal bosta ġimgħat qabel bdiet il-Presidenza, kienu jkunu ħafna li jsaqsuni dwar il-logo tagħna. Dejjem kont ngħid li se jkun logo li juri ’l Malta tal-lum – Malta moderna, ikkulurita bid-diversità, Malta li tħares ’l quddiem b’ottimiżmu kemm għaliha nnifisha kif ukoll għall-Ewropa. Nista’ ngħidlek li meta ħareġ il-logo u bdejna anke inqassmu r-rigali tal-Presidenza dawn intgħoġbu ħafna. Mhix l-ewwel darba li jkun hemm min jgħidlek li l-logo Malti hu wieħed mill-isbaħ minn dawn l-aħħar Presidenzi. L-iktar li jagħtini sodisfazzjon hu meta jkunu qegħdin jassumu li nqabbdet xi kumpanija kbira internazzjonali tar-reklamar biex tiddisinja l-logo u mbagħad tgħidilhom li dan kien frott ix-xogħol ta’ studenta żagħżugħa mill-MCAST li rebħet kompetizzjoni fost studenti b’logos differenti għall-Presidenza Maltija.
Ħafna jgħidulek li jixtiequ li l-Gvernijiet tagħhom għandhom daqshekk fiduċja fiż-żgħażagħ daqs il-Gvern Malti – anke meta jaraw l-età u l-entużjażmu tal-maġġoranza tan-nies li qed jaħdmu l-Presidenza Maltija fi Brussell.
Ħaġa oħra ħelwa li qed tmur tajjeb mal-kollegi barranin tagħna hu dak li jien insejjaħlu l-‘ħoss ta’ Malta’ fil-Kunsill tal-Unjoni Ewropea. Bażikament, kull minn jidħol fil-bini tal-Kunsill jista’ jgħaddi minn mina li ħloqna u xħin tidħol fiha tista’ tisma’ l-ħoss tal-mewġ tal-baħar jħabbat max-xtajta Maltija permezz ta’ instrument li b’ħafna boċċi żgħar tal-ħadid jirreplika l-ħoss tal-mewġ.
Tieħu gost tara nies minn madwar id-dinja jmorru biex jisimgħu b’kużità l-ħoss ta’ Malta.
X’qed jgħidu dawk li esperjenzaw presidenzi ta’ pajjiżi oħra. Kif qed iqabblu l-Presidenza Maltija ma’ oħrajn?
Impressjonanti bil-momentum ġdid u frisk li qegħdin nippruvaw inġibu għall-Ewropa.
Kienu bosta li qaluli li kienu impressjonati bid-diskors tal-Prim Ministru Joseph Muscat fil-Parlament Ewropew u tal-Ministri l-oħrajn kollha fil-kumitati. Qaluli li qegħdin nidhru bħala Presidenza differenti minn ħafna oħrajn. M’aħniex nirrepetu dak li dejjem kulħadd jgħid għaliex bilfors irid jingħad.
Il-Prim Ministru, pereżempju, tkellem b’mod ċar ħafna dwar x’għandu jsir biex insalvaw il-proġett Ewropew. Mingħajr tlaqliq u mingħajr ħabi, mhux bħalma jiġri normalment, ma jmurx ikun hemm xi ħaġa li ma tinżilx tajjeb ma’ xi ħadd jew ma’ ieħor. Dan l-istil ta’ ġenwinità u oġġettività qiegħed jinżel tajjeb u jemmnu li hu l-uniku mod li permezz tiegħu nistgħu mhux biss insalvaw, iżda nsaħħu l-għaqda bejn il-pajjiżi Ewropej.
Kollega tiegħi minn wieħed mill-Istati Membri l-oħra qalli li jkun tajjeb, bħalma qegħdin jgħidu ħafna, li kieku nsellfu l-Prim Minsitru tagħna lill-Ewropa għas-snin li ġejjin f’waħda mill-karigi permanenti ta’ tmexxija Ewropea. Ir-risposta tiegħi dejjem tkun li filwaqt li rridu naraw lill-Ewropa timxi ’l quddiem, Joseph Muscat għad fadallu ħafna x’joffri lil pajjiżna qabel ma jimxi għal karigi oħra. Bi tbissima ngħidilhom li beda programm ta’ bidla għal pajjiżna li qiegħed iħalli r-riżultati u rriduh li jkompli jġib iktar bidliet importanti favur iċ-ċittadini Maltin u Għawdxin.
