Wara d-deċiżjoni li ħa t-Tribunal dwar l-Ambjent u l-Ippjanar fi ħdan l-Awtorita tal-Ippjanar, l-art f’Ħondoq ir-Rummien issa hija ħielsa.
Qal dan is-Sindku tal-Qala, Paul Buttigieg, f’kumment ma’ ONE News, wara li an it-tribunal ikkonferma d-deċiżjoni tal-Awtorità tal-Ippjanar li ma jkunx hemm żvilupp f’din il-bajja.
Kieku ġie approvat, dan l-iżvilupp f’din il-bajja f’Għawdex kien ikun jinkludi lukanda ta’ ħames stilel, marina tal-jottijiet, u villaġġ turistiku.
Is-Sindku tal-Qala esprima s-sodisfazzjon kbir tiegħu għal din id-deċiżjoni wara ħidma li ma qatgħet xejn tul dawn l-aħħar għoxrin sena.
Huwa qal, “Illum ninsabu ġurnata wara li ttieħdet id-deċiżjoni li konna ilna nistennew 20 sena biex b’hekk Ħondoq ir-Rummien fl-aħħar, xi darba, għad jingħata lill-poplu Malti u Għawdxi kollu. Nixtieq nuri s-sodisfazzjon tiegħi li, wara dan iż-żmien kollu, issa nistgħu nibdew inwettqu t-triq biex Ħondoq jingħata lura lill-poplu Malti u Għawdxi kollu.”
Paul Buttigieg innota li, li kieku ttieħdet deċiżjoni favur l-iżvilupp tal-post, il-poplu Malti u Għawdxi kien jitlef din il-bajja pittoreska.
Dwar id-deċiżjoni li ma jsirx l-iżvilupp, it-Tribunal tal-Awtorità tal-Ippjanar qal li għalkemm il-Pjan Lokali ta’ Għawdex jippromovi r-riabilitazzjoni tal-pajsaġġi li sofrew ħsara minn xi attività tal-barrieri fil-passat, it-tip, l-iskala, u d-densità tal-proġett propost jaqbżu bil-kbir l-interventi meqjusa aċċettabbli għal din iż-żona.
Dwar din id-deċiżjoni, fil-Parlament fid-diskors dwar il-budget, il-Prim Ministru Robert Abela qal li dawk li ma waqfux jaħdmu biex jipproteġu din il-bajja għandhom l-appoġġ tiegħu.
