“Għandha bżonn isir riforma fis-sistema ġudizzjarja ta’ pajjiżna b’mod partikolari fejn jidħol il-ħelsien mill-arrest ta’ akkużat li jkun għaddej minn proċeduri fil-Qorti.”
Sostna dan l-Eks Spettur tal-Pulizija u Kriminologu John Charles Ellul. Dan fid-dawl li s-suspettat ewlieni fl-omiċidju ta’ Mario Farrugia u li tressaq il-qorti l-Ġimgħa, kien ingħata l-ħelsien mill-arrest sakemm qed jaffaċċja proċeduri kriminali oħra li fihom qed jaffaċċja akkużi ta’ attentat ta’ qtil.
Ellul tenna, “Il-persuna li tressqet il-Qorti għandha każ ieħor li jġorr l-istess piena li miegħu iġor l-għomor, mela dan qed jiġri barra fuq bail u allura din il-persuna mingħajr ma nagħmel preġudizzju, imma meta għandek persuna li ma għandiex x’titlef u qed tiġri barra ma hemm l-ebda detterrent ieħor li jżommha milli tagħmel.”
ONE News tkellem ukoll mall-Avukat Veronique Dalli li min-naħa l-oħra sostniet li l-ħelsien mill-arrest jibqa’ dritt tal-akkużat, u għalhekk m’għandux ikun hemm diskussjonijiet dwaru.
L-Avukat Dalli stqarret, “Il-bail kien u għadu jibqa’ jagħmel sens. Ejja nżommu f’moħħna li l-każ li ssemma huwa wieħed minn ħafna każijiet li jkunu qegħdin jiġu mressqa quddiem il-qrati. Huwa każ eċċezzjonali li meta tittrata xi ħaġa eċċezzjonali, il-bail hija r-regola imbagħad il-qorti tara l-kandidat għandux jieħu l-ħelsien mill-arrest jew le.”
Filwaqt li qal li d-dritt tal-bail immur paripasu mall-preżuzzjoni tal-innoċenza, Ellul sostna li jrid jinstab bilanċ bejn id-dritt tal-bail u l-preżunzjoni tal-innoċenza. Sostna li ma jistax ikun li bniedem li jkun qed jiġi akkużat b’delitt idum ikaxkar is-snin. Dan anke fid-dawl li wara kull delitt hemm il-vittmi u l-familjari.
Ellul qal, “Qed naraw li l-effetività tal-bail mhux taħdem u mhux qed taħdem ukoll it-trapass taż-żmien li wieħed qed jistenna dan id-dewmien kollhu biex issir il-kumpilazzjoni minflok aħna, illum bit-teknoloġija li għandna u prosit lill-Pulizija, ġie solvut f’qasir żmien imma mhux biss issa tibda l-kumpilazzjoni u tieħu żmien u naraw ġuri xi tmien snin oħra.”
Filwaqt li l-Avukat Dalli qalet li hu perikoluż li wieħed jaħseb li għandu jitneħħa l-bail, qablet li għandu jkun hemm xi tip ta’ riforma sabiex issir ġustizzja aħjar kemm mall-akkużat u anke mall-vittmi.
Dalli tenniet, “Li rridu naħsbu hu; min qed jitressaq qed jiġi proċessat fi żmien raġenovoli, minn qed jitressaq jaf meta se jispiċċa l-proċess ġudizjarju tiegħu? Il-familja jew il-vittmi għandhom idea meta se jintemm dak il-proċess ġudizzjarju? Le ma għandhomx għax il-liġi tagħna titkellem fuq ir-reati li huma ċari, titkellem fuq l-elementi ta’ reati, titkellem fuq pieni iżda ma titkellimx fuq meta għandu jintemm il-proċess ġudizzjarju, huwa hemmhekk li rridu nibdew niddiskutu.”
L-Eks Spettur John Charles Ellul, qal lill-proċess ġudizzjarju għandu jiqsar b’tali mod li l-kors tal-ġustizzja jsir f’temp ta’ jiem, b’hekk jekk wieħed jingħata l-bail dan ikun ukoll qasir u ma jkunx ta’ detriment għas-soċjetà.
Tenna, “Ikun hemm perjodu dak li ngħidulu pre-trial period bil-hearings ikunu kuljum mhux kull tliet xhur, ikun hemm perjodu ta’ 30 ġurnata fejn jinstemgħu l-provi kollha, cut-off date imbagħad tliet xhur oħra biex isiru t-trattazzjonijiet dak li ngħidulu filter tal-informazzjoni li jkun hemm u bniedem jgħaddi ġuri kemm jista’ jkun malajr.”
Min-naħa tagħha l-Avukat Dalli qalet li għandu jiġi stabbilit tul ta’ żmien li proċess ġudizzjarju għandu jieħu, pero dan iż-żmien ma għandux joħloq periklu fuq is-sistema ġudizzjarja. Qalet li dan iż-żmien għandu jkun wieħed li jagħmel sens u allura anke jagħti ċ-ċans lill-Pulizija sabiex tagħmel xogħlha.
Hija stqarret, “Pero jridu jkunu termini realistiċi li jippermettu l-prosekuzzjoni tagħmel ix-xogħol tagħha b’mod li tressaq dik il-prova li għandha bżonn biex tikkonvinċi lil minn se jkun qed jiġġudika, u tkun ċara għal kulħadd għax ma jistax ikun li għandek sitwazzjonijiet fejn għandek kumpilazzjonijiet li ilhom ħmistax-il sena fejn la hu tajjeb għas-soċjeta, la għall-akkużat u anqas għal familja tal-vittma ta’ dak ir-reat.”
Intant, ONE News hu nfurmat li t-tliet persuni l-oħra li ġew arrestati ma’ Elliot Paul Busuttil nhar l-Erbgħa b’rabta mall-omiċidju ta’ Mario Farrugia ngħataw il-Police Bail. Dan filwaqt li fl-aħħar siegħat il-Pulizija kellmet persuna oħra b’rabta ma’ dan il-każ li wkoll ingħata l-Police Bail.
