Tama ġdida, dinjità lil kulħadd.
Dan kien il-kliem li bih il-Prim Ministru Robert Abela ddeskriva skema ġdida li permezz tagħha issa persuni b’kundizzjonijiet mediċi jistgħu jikkwalifikaw għal polza ta’ assigurazzjoni fuq saħħithom u li twassal biex jakkwistaw self mill-banek sabiex jixtru proprjetà.
Din l-inizjattiva tħabbret mill-Prim Ministru nnifsu waqt konferenza tal-aħbarijiet f’Kastilja flimkien mal-Ministru għall-Akkomodazzjoni Soċjali Roderick Galdes.
Huwa spjega li l-Gvern, wara li sema’ diversi esperjenzi, quddiem din is-sitwazzjoni inġusta ma setax jibqa’ ċass u wara ħidma aggressiva nstabet soluzzjoni mingħajr kunflitt u kompetizzjoni mas-suq privat.
Fil-fatt, hekk kif persuna ma tkunx tista’ tieħu polza ta’ assigurazzjoni minħabba kundizzjonijiiet mediċi, issa din l-iskema tipprovdi garanzija bankarja li tagħmel tajjeb flok il-polza ta’ assigurazzjoni fuq il-ħajja.
B’hekk il-bank ikun jista’ javvanza fuq is-self.
Madankollu l-Gvern se jidħol ukoll f’każijiet fejn it-talba għall-polza ta’ assigurazzjoni fuq il-ħajja tiġi approvata madankollu tibqa’ pendenti minħabba ħlas eċċessiv ta’ premiums.
Hawnhekk l-Awtorità tad-Djar se tkun qed tidħol sabiex tgħin f’din is-sitwazzjoni ukoll.
Għal dan l-iskema l-Prim Ministru ħabbar li tnieda fond ta’ €3 miljun mill-Fond Soċjali għall-Iżvilupp Nazzjonali, biex iservi ta’ garanzija għall-banek biex jipprovdi s-self.
Din il-garanzija mill-Gvern tkopri self ta’ kwart ta’ miljun ewro fuq kull propjetà.
Minn naħa tiegħu, il-Ministru għall-Akkomodazzjoni Soċjali Roderick Galdes spjega li persuna għandha l-ewwel tfittex polza tal-assigurazzjoni minn kumpanija lokali.
F’każ li din ma tinstabx, l-applikazzjoni tiġi posposta għal 12-il xahar jew il-polza tkun stmata bi prezz li jkun darbtejn u nofs aktar mill-prezz medju, il-persuna tkun tista’ tapplika għal din l-applikazzjoni mal-Awtorità tad-Djar u l-Kummissjoni għad-Drittijiet tal-Persuni b’diżabilità.
Wara li dan il-proċess jiġi verifikat u jinħareġ ċertifikat kif ukoll ittra ta’ rakkomandazzjoni lill-banek li qed jipparteċipaw f’din l-iskema.
Minn hemm il-banek ikunu jistgħu jiffinalizzaw il-proċess ta’ self lil dawn l-applikanti.
F’każ li persuna tikseb forma ta’ garanzija oħra fuq ammont akbar, il-bank jista’ jaċċetta li jsellef ammont akbar minn dak stipulat.
Fi tweġibiet lill-ġurnalisti ntqal li huwa kkalkulat li kull sena jkun hemm erbgħin każ li ma jkollhomx id-dritt għal self mingħajr din l-iskema.
