Fi żjara lill-pazjenti Maltin li qed jirċievu l-kura medika f’Londra, il-Prim Ministru Robert Abela ħabbar li l-Gvern għaddej bit-tħejjijiet biex l-ewwel għaxar mediċini minn ftit aktar minn erbgħin għall-kura tal-kanċer jidħlu fil-formularju u b’hekk jingħataw mingħajr ħlas.
Dan bħala parti minn bidla tranżitorja li fiha l-Gvern se jieħu fuqu l-piż tal-mediċini tal-kanċer flok il-fondazzjoni Malta Community Chest Fund u b’hekk il-pazjenti jingħataw il-kura bi dritt, u mhux b’karità. Sakemm isseħħ il-bidla, il-pazjenti xorta se jibqgħu jkunu mgħejjuna mill-Malta Community Chest Fund.
Flimkien ma’ Angele Cuschieri u Rennie Zerafa ta’ Puttinu Cares, il-Prim Ministru Robert Abela u martu Lydia Abela tennew l-appoġġ kontinwu li Malta tibqa’ tagħti għal kawżi soċjali bħal ma tressaq ’il quddiem din l-għaqda li twettaq ġid kbir fis-soċjetà Maltija.
Mal-Prim Ministru Robert Abela f’Londra kien hemm il-Ministru għas-Saħħa Jo Etienne Abela, li flimkien waslu dan il-messaġġ ta’ kuraġġ lill-familji Maltin.
“Tifhem li għaddejjin min-mumenti ta’ diffikultà kbira sfidi li huma kbar iżda imbagħad tara s-solidarjetà tal-poplu Malti, l-għajnuna li qed jagħti l-Gvern b’mod ġenerali biex is-sofferenza ta’ dawn il-persuni nnaqqsuha kemm nistgħu, imbagħad ukoll li nipprovdu s-servizzi kollha li huma meħtieġa biex il-pazjent jista’ jiffoka fuq saħħtu fuq il-kura tiegħu mbagħad l-istat u l-għaqda volontarja jieħdu ħsieb s-saħħa kollha tagħhom u hawnhekk fejn verament nara l-valuri tant b’saħħithom tal-poplu Malti u Għawdxi.”
Il-Prim Ministru Robert Abela
Iż-żjara tal-Prim Ministru bdiet fl-isptar Royal Marsden li huwa meqjus bħala wieħed mill-aqwa ċentri tal-onkoloġija fid-dinja. Milqugħ mill-konsulent Dr Francesca Sillito, Dr Abela seta’ jara x-xogħol li jsir biex tingħata kura speċjalizzata lil min jiġi bżonnha.
Dr Abela, li huwa l-ewwel Prim Ministru Malti li żar lil Puttinu f’Londra, iltaqa’ wkoll mal-kirurgu Malti Matthew Schembri li jaħdem f’dan l-isptar fejn jispeċjalizza fir-robotika għat-trattament tal-kanċer tal-prostata u jirriċerka dwar l-użu tal-intelliġenza artifiċjali biex titjieb il-ħajja tal-pazjent fil-vjaġġ tiegħu wara d-djanjożi.
“Ġieli nkun miexi fil-kuritur, niltaqa’ ma’ xi pazjent Malti u tinduna li jieħdu r-ruħ, meta tkellimhom bil-Malti għax qegħdin hawn ovvjament għal xi ħaġa tqila għalihom, it-trattament tal-kanċer għallura jsibu lil xi ħadd familjari magħhom jħossuhom komdi ħafna.”
Matthew Schembri – Kirurgu Malti
F’isem il-Gvern Malti, il-Prim Ministru ppreżenta wkoll donazzjoni lir-Royal Marsden Cancer Charity li se tmur għal investiment fir-riċerka.
Iż-żjara kompliet fl-appartamenti ta’ Puttinu Cares f’Sutton. Hawnhekk, Dr Abela tkellem ma’ persuni ta’ etajiet differenti li qed jgħixu f’dawn il-postijiet sakemm jieħdu l-kura meħtieġa. Dawn il-familji nnotaw l-appoġġ kbir li jirċievu mingħand Puttinu Cares. Ġie rrimarkat ukoll kif l-għajnuna mogħtija mill-Gvern tissarraf li f’mument ta’ sfida, jiġu koperti l-ispejjeż marbuta mal-vjaġġ mhux biss ta’ persuna waħda li takkumpanja lill-pazjent, fosthom tfal, iżda anki t-tieni persuna.
Iż-żjara kompliet fil-proprjetà l-ġdida ta’ Puttinu Cares fiċ-ċentru ta’ Londra, fejn qed jinbnew appartamenti għall-familji Maltin u Għawdxin eqreb ta’ fejn il-pazjenti jirċievu t-trattament mediku. Ingħad kif din il-binja, frott id-donazzjonijiet tal-poplu Malti u l-għajnuna mill-Gvern, se tkun imsemmija għall-mibki tabib Dr Victor Calvagna, li ħadem ma’ għadd ta’ tfal u familji li ntlaqtu mill-marda tal-kanċer.
Bis-saħħa ta’ din il-binja, li issa hemm permessi biex jitla’ wkoll sular ġdid, se jiġu akkomodati mat-80% tal-pazjenti u qraba li jiġu bżonn akkomodazzjoni waqt li jkunu fl-Ingilterra biex jirċievu l-kura.
Sitwazzjoni li sa għoxrin sena ilu kienet għal kollox differenti, hekk kif il-familji u l-pazjenti kien ikollhom jaħsbu huma fejn joqogħdu bl-ispejjeż li ġġib magħha. Preżentament bejn sittin u disgħin pazjent jivvjaġġaw minn Malta lejn l-Ingilterra kull xahar biex jirċievu kura fi sptarijiet fiċ-ċentru ta’ Londra.
Iż-żjara tal-Prim Ministru ntemmet għand is-sorijiet Franġiskani f’Londra li wkoll jiddedikaw il-ħin u r-riżorsi tagħhom biex joffru assistenza mill-qalb, b’servizzi li jiffaċilitaw il-ħajja tal-familji Maltin waqt li jkunu għaddejjin minn mumenti ta’ sfida.
Intant, il-President ta’ Puttinu Cares Angele Cuschieri rringrazzjat lill-poplu Malti u Għawdxi tal-appoġġ li dejjem wera lejn l-għaqda li taħdem mal-familji, fosthom tfal morda bil-kanċer.
“Bis-saħħa tad-donazzjonijiet u grazzi għall-poplu Malti u Għawdxi rnexxielna nixtru għoxrin appartament li qed nagħtu u noffru b’xejn lil dawn il-pazjenti u l-familjari tagħhom li jiġu f’dan l-isptar issa nħeġġu biex fil-Ġimgħa l-Kbira bħalma għamilna hawnhekk f’Sutton, noffru akkomodazzjoni wkoll ġewwa ċ-ċentru ta’ Londra din id-darba.”
Angele Cuschieri – President ta’ Puttinu Cares
