Il-Gvern se jimplimenta żewġ miżuri mħabbra fil-baġit għal din is-sena, mmirati lejn ġenituri self-employed.
L-ewwel miżura hija dik favur ġenituri prospettivi li jaħdmu għal rashom u li jagħmlu t-trattament tal-IVF – hekk kif il-Gvern mhux biss qed jassisti fit-trattament innifsu, iżda wkoll permezz ta’ leave – li issa se jkun estiż ukoll għall-persuni self-employed.
Dawn il-ġenituri li jaħdmu għal rashom, se jibbenefikaw minn 100 siegħa leave mħallas għal kull ċiklu ta’ trattament – hekk kif l-omm se tkun intitolata għal 60 siegħa leave, u l-partner għal 40 siegħa oħra – li se jkun qed jitħallas bil-livell tal-paga minima nazzjonali.
Il-Ministru għall-Politika Soċjali u d-Drittijiet tat-Tfal, Michael Falzon stqarr illi dan il-Gvern se jkompli jinvesti f’sessjonijiet ta’ terapija regolari, kemm individwali u anke fi gruppi, akkumpanjati minn appoġġ psikoloġiku u akkademiku.
Minn naħa tiegħu s-Segretarju Parlamentari, Andy Ellul tkellem dwar il-miżura tal-Estensjoni tad-dritt għal leave ta’ paternita’ lil min jaħdem għal rasu. Andy Ellul saħaq li l-leave tal-partenita’ diġa jingħata lil dawk li huma mpjegati. Issa se jibda jingħata wkoll lil dawk li jaħdmu għal rashom bil-ħlas ta’ 10 t’ijiem jew 80 siegħa fl-okkazzjoni tat-twelid jew adozzjoni fil-familja.
Intant sal-aħħar ta’ din il-ġimgħa jiskatta l-proċess sabiex jinfetħu l-applikazzjonijiet għal dawk il-persuni illi jistgħu jkunu eliġibbli għal miżura tal-IVF. Fl-istess ħin għaddej ix-xogħol sabiex fil-jiem li ġejjin tiġi mplimentata l-miżura tal-‘parental leave’ għas-‘self employed’ – li tapplika wkoll għall-ġenituri LGBTIQ+.
Waqt din l-istess konferenza, tkellmet wiċċ rinomat f’pajjiżna – Martina Zammit, li flimkien mal-mara tagħha għamlet it-trattament tal-IVF – trattament li ddeskriviet bħala diffikultà fiżika u emozzjonali, hekk kif trid tibbilanċa x-xogħol u dal-proċess, b’testijiet, scans u mediċina.
Żiedet tispjega kif permezz ta’ din l-iskema se jkunu qed jiġu megħjuna s-self-employed waqt dan il-proċess diffiċli, hekk kif il-postijiet tax-xogħol se jkunu aktar inklussivi għal kulħadd u anke għal kull familja.
