Tmenin familja li jgħixu f’binja Buqana issa għandhom moħħhom mistrieħ illi darhom issa hija sigura. Dan wara li l-Gvern intervjena billi b’investiment ta’ kważi €3 miljun, saħħaħ l-istruttura tal-binja li kienet inbniet fil-bidu tas-snin disgħin minn Gvern Nazzjonalista.
F’konferenza stampa fid-daħla ta’ waħda mill-blokok, il-Ministru għall-Akkomodazzjoni Soċjali Roderick Galdes qal illi sa mill-bidu li nbniet il-binja, kien jidher li kien hemm problemi strutturali fosthom fil-konkos.
Il-Ministru Roderick Galdes stqarr: “Din hija l-istorja ta’ Binja Buqana li ilha għaddejja mill-1992-93, irridu nifhmu wkoll li din kienet xi ħaġa endemika fil-proġetti tal-Gvern sfortunatament taħt Gvern Nazzjonalista li l-kwalità tal-konkrit kien ikun difettuż u hemmhekk ikolli ngħid li hemm il-konvinzjoni morali tiegħi li hemm ukoll il-korruzzjoni involuta.”
Il-Ministru Galdes kompla jgħid li minkejja li fl-2013 il-każ kien preskritt u għalhekk il-Gvern ma setax ifittex legalment lil min kien responsabbli għal din il-binja, xorta waħda intervjena sabiex it-80% familja li jgħixu f’din il-binja ma jitħallewx fil-periklu li kienu ilhom snin jgħixu fih.
Il-Kap Eżekuttiv tal-Awtorità tad-Djar Leonid McKay qal illi kien obbligu morali sabiex l-awtorità tintervjeni u tgħin lil dawn il-familji.
Min-naħa tagħha, il-Perit spjegat ix-xogħlijiet li saru.
Hija qalet, “Bdejna primarjament mill-garaxxijiet, dan kien proċess ta’ ħames snin ta’ xogħlijiet, imbagħad tlajna fis-sular ta’ fuq, ground floor level għax kellna wkoll problema fit-travi u fil-kolonni eżistenti u nistgħu ngħidu issa li hawn 80 appartament u 80 familja nistgħu ngħidu li qed jgħixu b’mod sigur.”
