Il-Ministeru għall-Wirt Nazzjonali, l-Arti u l-Gvern Lokali daħal f’konvenju mas-sidien tas-sede tal-Banda King’s Own fil-Belt Valletta, bil-għan li l-proprjetà tinxtara u s-soċjetà mużikali tiġi protetta mir-riskju imminenti li kellha ta’ żgombrament.
Fil-fatt, din l-għaqda artistika, bħal oħrajn qabilha, kienet qed tiffaċċja tali riskju minħabba s-sitwazzjoni legali marbuta mal-liġijiet tal-kera ta’ qabel l-1995.
Issa l-Gvern intrabat li jinvesti b’kollox €7.4 miljun għall-akkwist tal-proprjetà fil-qalba tal-kapitali bħala ħlas għax-xiri tal-binja, kif ukoll €1.8 miljun oħra li jirrappreżentaw ħlas ta’ danni lis-sidien skont il-liġi.
Il-Ministru responsabbli Owen Bonnici saħaq li, b’dan il-konvenju, il-Gvern qed juri l-impenn qawwi tiegħu, għal darb’oħra, biex jasal għal soluzzjoni billi jaġixxi korrettament kemm mas-sidien kif ukoll mas-soċjetà mużikali nnifisha.
Hu spjega li, fil-mument li jsir il-kuntratt finali, din il-proprjetà se tingħaqad mal-portafoll ta’ proprjetajiet li huma lkoll sede ta’ soċjetajiet mużikali li qed jiġu mmaniġġjati minn sezzjoni apposta fi ħdan il-Kunsill Malti għall-Arti.
Biex, imbagħad, is-soċjetajiet mużikali rispettivi jkunu marbuta li jħallsu l-kera lill-Gvern.
“Aħna determinati li nkomplu nmexxu ’l quddiem is-soċjetajiet mużikali Maltin u rrid nfakkar li l-UNESCO irrikonoxxa l-festa bħala wirt intanġibbli tal-umanità u, allura, dan hu responsabbiltà fuqna u fuq spallejna biex aħna nkunu hemmhekk għas-soċjetajiet mużikali Maltin, kif qed nagħmlu proprju issa mas-Soċjetà Mużikali King’s Own tal-Belt Valletta.”
Il-Ministru Owen Bonnici
James Pearsall, li hu inkarigat mill-kumitat amministrattiv fi ħdan il-Kunsill Malti għall-Arti, qal li dan hu investiment f’qalb il-komunità Beltija, fejn il-King’s Own Band Club qed jiġi mħares u mogħti lura lin-nies bħala parti mill-identità Maltija.
Preżenti għall-iffirmar tal-konvenju kien hemm ukoll il-President tal-Għaqda King’s Own, il-Perit Ivan Piccinino, membri tal-kumitat tas-soċjetà, u membri tal-Kunsill tal-Belt, immexxija mis-Sindku Olaf McKay.
