Il-Gvern ser ikun qed jagħti s-somma ta’ €5 miljun lill-Fondazzjoni Puttinu Cares.
Ħabbar dan il-Prim Ministru Robert Abela waqt konferenza tal-aħbarijiet fil-Berġa ta’ Kastilja fejn fiha ġie ssiġillat ftehim li permezz tiegħu Puttinu Cares ser tkun tista’ twettaq proġett ta’ appartamenti f’Londra għal pazjenti li għandhom bżonn kura speċjalizzata.
B’hekk issa Puttinu Cares se jkollha 20 appartament ieħor fi propjetà ġdida, f’Chalk Farm f’Londra.
Il-Prim Ministru Robert Abela ddeskriva din il-ġurnata bħala waħda ta’ sodisfazzjon kbir.
Ġurnata li mmarkat it-tmiem ta’ proġett xejn faċli biex jitwettaq.
Dan speċjalment fil-kuntest tal-pandemija li ħakkmet lid-dinja.
Il-Prim Ministru Robert Abela qal: “Kien hemm il-possibilità li dak li se niffirmaw illum seta’ jisfratta. Ma aċċejtaniex imma dan għaliex emminna li s-saħħa tal-pazjent Malti u Għawdxi tirbaħ fuq kull kunsiderazzjoni oħra. Is-saħħa tan-nies tagħna hija l-ewwel prijorità.”
Iċ-Chairman ta’ Puttinu Cares, Victor Calvagna spjega li l-ħolma ta’ Puttinu kienet dejjem li ssib proprjetà fil-qalba ta’ Londra.
Huwa stqarr: “Fl-aħħar irnexxielna nsibu the right property ġewwa Chalkfarm ġoċ-ċentru ta’ Londra li qiegħda 30 minuta ‘l bogħod mill-isptarijiet prinċipali u dħalna f’taħdidiet mal-Gvern li llum wasalna biex niffirmaw dan il-ftehim biex inkunu nistgħu nġibu din il-propjetà.”
Id-Deputat Prim Ministru u Ministru għas-Saħħa Chris Fearne sostna li dan il-ftehim jikkumplimenta l-impenn tal-Gvern favur is-saħħa tal-Maltin u l-Għawdxin.
Qal li dan huwa impenn rifless f’servizz ta’ saħħa mill-aqwa li joffri pajjiżna.
Fearne qal ukoll li madwar 800 pazjent fis-sena jintbagħtu għal kura speċjalizzata li tindirizza mard rari.
Għal dawn il-pazjenti, Fearne spjega wkoll kif jitħallsu mhux biss il-vista fl-isptarijiet iżda anke t-titjiriet u servizzi ta’ taxi.
Id-Deputat Prim Ministru Chris Fearne sostna: “Inħallsu saħansitra t-taxi service ġewwa Londra. Jiġifieri meta inti tasal l-Airport issib taxi tistennik li tieħdok l-isptar jew l-akkomodazzjoni li tkun fiha. Jekk ħa tkun hemmhekk għal iktar minn vista waħda tieħdok u ġġibek lura mill-isptar għall-akkomodazjoni li għandek. Is-sena l-oħra nfaqna mal-kwart ta’ miljun sterlina fuq taxi service għall-pazjenti Maltin li jmorru Londra.”
Fil-konferenza tal-aħbarijiet tkellem ukoll il-Ministru għall-Finanzi Edward Scicluna hekk kif spjega li l-fondi marbuta ma’ dan il-ftehim ġew mill-flus miġbura mill-Programm taċ-Ċittadinanza b’investiment, propju mill-Fond għall-Iżvilupp Soċjali.
Fil-fatt spjega li dan il-ftehim għandu terminu ta’ 15-il sena: “Il-Gvern se jagħmel użu minn dawn l-appartamenti, jagħmel il-ħlas tiegħu ta’ £170,000 għal dawk l-appartamenti li huma kbar fil-qalba ta’ Londra u fil-każ ta’ Sutton iħallas inqas għall-appartament fil-fatt £80,000. Apparti dan il-Gvern jgħaddi grant ta’ €150,000 fis-sena li titla’ bl-10% kull 5 snin.”
