Din is-sena, l-għajnuna tal-fertilizzanti għall-bdiewa tqassmet b’mod differenti, u ġiet riflessa anke l-vuċi tal-bdiewa Maltin u Għawdxin.
Dan anke fost l-oħrajn, permezz ta’ diskussjonijiet mal-Għaqda Bdiewa Attivi, biex b’hekk ġie deċiż li dan jitqassam b’mod differenti u ġust – skont ir-raba’ li jkollok.
Matul l-Ewwel Fażi, il-benefiċjarji eliġibbli kienu dawk il-bdiewa attivi li kienu ibbenefikaw mill-Miżura 13, jiġifieri dawk b’limitazzjonijiet taż-żona, naturali jew speċifiċi, matul is-sena 2023. Dawn il-bdiewa kienu eliġibbli għal €200 għal kull ettaru.
Barra minn hekk, dawk il-bdiewa li kienu rreġistrati mar-Reġistru taż-Żebbuġ jew mar-Reġistru tad-Dwieli mad-Direttorat tal-Agrikoltura, kienu eliġibbli għal €450 għal kull ettaru ta’ art iddedikata għat-tkabbir taż-zebbug u tad-dwieli.
Matul it-Tieni Fażi, imbagħad, il-benefiċjarji eliġibbli kellhom ikunu bdiewa attivi li jaqgħu fil-Kategoriji 3 sa 5 – skont il-klassifikazzjoni tal-bdiewa kif stipulata mid-Direttorat tal-Agrikoltura.
Dawn il-bdiewa setgħu japplikaw permezz ta’ Koperattiva, Għaqda, Organizzazzjoni jew entità oħra rikonoxxuta li tirrappreżenta lill-bdiewa.
Wara li jsiru l-verifiki meħtieġa biex jiġi evitat ħlas doppju, il-fondi jiġu trasferiti lill-organizzazzjoni, li imbagħad tqassamhom lill-membri tagħha skont metodu miftiehem minn qabel.
F’kummenti li taw għadd ta’ bdiewa, dawn spjegaw kif din kienet ta’ għajnuna kbira, tant li jittamaw li terġa’ toħroġ għal sena oħra.
“Nirringrazzjaw lill-Gvern, u b’mod speċjali lill-Ministru Refalo tal-għajnuna li qed jagħtina. Din l-iskema, did-darba l-fondi tqassmu ħafna ħafna aħjar. Nirrigrazzjaw lill-kooperattivi u lil min ta sehmu biex jitqassmu dawn il-finanzi, imma din id-darba ma kienx hawn tgergir mill-bdiewa.”
“Marru aħjar. Mhux bħall-meta jtuk għax bir-raba’. Skont x’raba’ jkollok, u din id-darba veru nħadmet kif għandha tkun.”
Malcom Borg, f’isem l-Għaqda Bdiewa Attivi, tkellem dwar kif il-prezz tal-fertilizzant għola ħafna kawża tal-gwerra bejn ir-Russja u l-Ukrajna, u għalhekk il-Gvern Malti ra li jintervjeni.
“Il-Gvern intervjena biex ikun jista’, jgħin, iġorr, biċċa mill-piż ta’ dik iż-żieda fl-ispejjeż. Din hi t-tieni darba li tqassam sussidju biex jgħin lill-produtturi jixtru l-fertilisers minħabba ż-żieda f’dan il-prezz.”
Malcom Borg – Għaqda Bdiewa Attivi
