Il-ġuri ta’ Rio Micallef mill-Marsa, David Tabone min-Naxxar u Darren James Vella minn Birkirkara, li ġew mixlija bi traffikar ta’ madwar 2,000 pillola ecstasy lura fl-2008, wasal fi tmiemu llum waranofsinhar fejn Micallef u Tabone nstabu ħatja, waqt li Vella ġie illiberat.
Il-ġurati, li daħlu jiddeliberaw aktar kmieni, fil-konfront ta’ Micallef waslu għall-verdett ta’ 6 bi 3 ħati f’komplott għal traffikar tad-droga, waqt li b’7-2 sabuh ħati ta’ bejgħ u pussess ta’ ecstasy li ma kinitx għall-użu personali. Tabone nstab ħati ta’ komplott fi traffikar ukoll b’vot ta’ 6 kontra 3, waqt li ma nstabx ħati fuq il-bqija tal-akkużi.
Vella, li kien rappreżentat mill-Avukati Michael Sciriha u Matthew Xuereb, ġie illiberat b’vot ta’ 8 kontra 1.
Il-Ħamis filgħodu, l-Imħallef Edwina Grima temmet l-indirizz tagħha b’rabta mal-każ.
Hu magħruf kif il-ġuri b’rabta ma’ dan il-każ ta’ 17-il sena ilu ġie xolt is-sena l-oħra wara li ġurat fuq il-lista tar-riserva baqa’ fl-awla waqt li kienu qed isiru xi diskussjonijiet bejn il-partijiet dwar l-akkużi.
Skont il-Prosekuzzjoni, lura fl-2008, Rio Micallef kien instab fil-pussess ta’ basket li kien fih aktar minn €9,000 fi flus kontanti kif ukoll miżien eletroniku li jintuża għat-traffikar. Il-Pulizija arrestat liż-żewġ akkużati l-oħrajn bħala kompliċi fir-reat.
Fil-Qorti ssemma wkoll kif il-Pulizija kienet elevat il-pilloli ecstasy b’valur li jiżboq it-€18,000.
